Os Departamentos de Orientación (DO) son un servizo interno de atención á diversidade existente nos centros educativos de secundaria e na maioría dos centros de primaria, que presta apoio ao propio profesorado do centro (especialmente os titores) e ao resto da comunidade educativa.
Entre os seus cometidos está o de intentar dar resposta ás necesidades de intervención ligadas a aspectos psicopedagóxicos e a cuestións socio-familiares que teñen incidencia no centro e polo tanto na organización da resposta que dende o centro se dea á diversidade do alumnado.
Foron creados polo Decreto 120/1998, do 23 de abril, polo que se regula a orientación educativa e profesional na Comunidade Autónoma de Galicia, e establecéndose a súa organización e funcionamento na Orde do 24 de xullo de 1998.
