Hoxe 21 de xuño, último día lectivo deste curso e Día Europeo da Música, o alumnado de Música de tódolos grupos do noso instituto veu ameniza-la fin de curso cun festival cheo de numerosas e variadas propostas musicais. Logo de moitos ensaios, nervios e con moita ilusión, soaron clásicos coma O son do ar, de Luar na Lubre, ou Smooth criminal, de Michael Jackson, no medio doutras pezas de estilos diversos como Malakatumba, de Josu Elberdin para coro (será esta a primeira de moitas actuacións dun coro mixto no Cabanillas...?), unha demostración de baile deportivo por parte de Pablo Iglesias e Noa Cores de 1º de Bacharelato que nos deixou coa boca aberta, e o alegre peche de festival coa estrea do recén creado grupo de Baile Tradicional Galego, dirixido pola profesora Lucía Enríquez e coa colaboración do Departamento de Música, no que profes e alumnos tocaron e bailaron unha xota e unha muiñeira da nosa bisbarra con moito xeito!
Trascanteadas entre as actuacións musicais sucedéronse tamén as entregas de premios e diplomas dos diferentes concursos e certames celebrados ó longo do ano: literarios, do equipo de Normalización Lingüística, de Xadrez, da Biblioteca... Sen esquecer ó alumnado de 2º do Ciclo de Elaboración de viños e aceites e de 2º de Bacharelato, que se despediu de nós recollendo as súas orlas de mans do Equipo Directivo, unha vez rematado o seu periplo no IES Ramón Cabanillas.
Foi, en fin, unha xornada intensa e feliz para despedir un curso cheo de vida, de actividade e de creatividade, tal e como o noso propio instituto é.
(Accedede ás imaxes picando no título da noticia)