Actividades Complementarias e Extraescolares

O pasado 5 de xuño coñecéronse os/as gañadores/as do IX Concurso de Debuxo Picasso organizado pola "Asociación da Prensa da Coruña (APC)" co patrocinio da Dirección Xeral de Cultura da Consellería de Cultura, Lingua e Xuventude, e coa colaboración do IES Eusebio da Guarda.

Entre os/as premiados/as figuran os traballos de varias das nosas alumnas:

Premio José Luis Bugallal á mellor ilustración: Luz Blanco Tato - IES Miraflores (Oleiros)-Profesora: Ana Sogo

Premio Olga Cristina Viaño Sánchez á mellor redacción: Alba Echeverri - IES Miraflores (Oleiros)-Profesora: Irene Lustres

Noraboa ás premiadas!

O luns, 13 de maio, fíxose entrega do cheque coa recadación total (6.131€) da VI Carreira da Luz á Asociación Operación Pangono Pangono, a cal irá destinada á compra dunha furgoneta para a residencia de estudantes Amaia María da Àrea 49 de Lilongwe de Malawi.

Grazas a todas as entidades colaboradoras e a todos/as os participantes por iluminar, unha vez máis, o noso proxecto de obra social que, neste caso, servirá para apoiar os labores solidarios da Asociación Operación Pangono Pangono.

Nesta primeira quincena de maio, o alumnado de 4ºESO e 1º BACH tivo a posibilidad de realizar unha visita á Casa das Ciencias, así como ao Planetario, onde puideron gozar dunha observación "simulada" do estado actual do noso ceo nesta etapa do ano.

Se ben é certo que a maioría do alumnado xa estivera algunha vez neste espazo en etapas anteriores educativas, a visita foi de gran interés xa que os contidos impartidos en física nestes niveis, permítelle ao alumando comprender de forma máis axeitada moitas das experiencias que levaron a cabo no museo, como as explicacións recibidas polo guía do planetario.

Na sesión desta semana de STEMB visitounos o Dr Enxeñeiro Manuel Andrés Soage, que nos falou das posibilidades do hidróxeno como almacen de enerxía, e comprobamos a enerxía das explosións do hidróxeno cunha práctica in situ, de como aprenden as máquinas a imitar o noso comportamento, botando unha partida a "pedra-papel-tesoiras" cunha intelixencia artificial e da simulación de comportamentos celulares con modelos matemáticos de pautas sinxelas, observando como se moven sobre unha matriz 2D ou 3D "células dixitais artificiais".

O Correlingua é unha iniciativa normalizadora que leva desde o ano 2006 levando a centos de centros educativos a dar pasos pola defensa e promoción do uso da nosa lingua.

O pasado 10 de maio un par de grupos de 1ºESO, xunto co alumnado de PDC e seis profesoras fixemos unha andaina polo paseo marítimo da Coruña para rematar nunha grande festa ao pé da Torre de Hércules. O día foi solleiro e espléndido, o que permitiu que gozásemos tanto do paseo como da compañía doutros centros educativos da  contorna, coincidindo ademais con alumnado de outros CEIP de Oleiros, de especial interese para o alumnado que desfrutou en compartir actividade con irmáns ou amigos que un ano atrás acudían con eles e elas ao mesmo cole.