blogue deadmin

Tendo informado á comunidade educativa da solicitude feita en prazo e en forma á Xefatura Territorial da Consellería de Cultura, Educación, Formación Profesional e Universidades do día 20 de maio de 2024 como non lectivo de centro, e á vista da posterior publicación da Instrucción 10/2023, do 25 de outubro de 2023, na que se establecen os días 20 e 21 de maio para realizar as posibles reclamacións das cualificacións finais no segundo curso de bacharelato ou da decisión de titulación nesta etapa educativa, informamos que, en Consello Escolar de centro, aprobouse a modificación do día non lectivo de centro solicitado do 20 de maio de 2024 ao 16 de maio de 2024.

EN CONSECUENCIA, O XOVES 16 DE MAIO DE 2024 SERÁ DÍA NON LECTIVO NO IES MIRAFLORES.

A Consellería de Cultura, Educación, Formación Profesional e Universidades vén de publicar a RESOLUCIÓN DEFINITIVA DE CENTROS BENEFICIARIOS DAS AXUDAS A CENTROS PÚBLICOS DEPENDENTES DA CONSELLERÍA DE CULTURA, EDUCACIÓN, FORMACIÓN PROFESIONAL E UNIVERSIDADES PARA A REALIZACIÓN DE PROBAS DE ACREDITACIÓN DE COMPETENCIA LINGÜÍSTICA EN LINGUAS ESTRANXEIRAS PARA O ALUMNADO QUE CURSE ESTUDOS DURANTE O CURSO 2023/2024, na que se asignan 2.400€ ao IES Miraflores para a realización das probas do alumnado de 2º de bacharelato.

A Resolución do 29 de setembro de 2023, da Dirección Xeral de Ordenación e Innovación Educativa pola que se regula a xestión de probas de acreditación de competencia lingüística en linguas estranxeiras para o alumnado que curse estudos en centros públicos dependentes da Consellería de Cultura, Educación, Formación Profesional e Universidades durante o curso 2023/2024, no artigo cuarto, Organización e xestión das probas, apartado 7, recolle: “Se a dotación económica outorgada ao centro beneficiario na resolución definitiva resultase insuficiente para cubrir todas as demandas do alumnado interesado os centros educativos deberán establecer os criterios de selección do alumnado aspirante ás probas que consideren máis oportunos. Estes criterios, dos que se informará ao claustro e que se aprobarán no consello escolar, serán transparentes, públicos e obxectivos”.

Sendo a dotación económica outorgada ao centro na resolución definitiva insuficiente para cubrir todas as demandas do alumnado interesado de 2º de bacharelato, informado o Claustro o 30 de outubro de 2023 e aprobado polo Consello Escolar na mesma data, o criterio de selección do alumnado aspirante ás probas será o seguinte:

Alumnado con maior cualificación final na materia de Lingua estranxeira: Inglés/Francés no curso 2022/2023 segundo a opción escollida na súa solicitude.

Alumnado con maior cualificación final na materia de Lingua estranxeira: Inglés/Francés no curso 2021/2022 segundo a opción escollida na súa solicitude.

Alumnado con maior cualificación final na materia de Lingua estranxeira: Inglés/Francés no curso 2020/2021 segundo a opción escollida na súa solicitude.

Alumnado con maior cualificación final na materia de Lingua estranxeira: Inglés/Francés no curso 2019/2020 segundo a opción escollida na súa solicitude.

Alumnado con maior cualificación final na materia de Lingua estranxeira: Inglés/Francés no curso 2018/2019 segundo a opción escollida na súa solicitude.

No caso de alumnado que realizase estudos no estranxeiro, tomarase para ese ano como referencia as cualificacións finais do curso inmediatamente anterior a ese.

A selección realizarase en acto público o luns, 29 de xaneiro de 2024, ás 10:10, no salón de actos do centro, levantarase acta da mesma e custodiarase no centro educativo.

O xoves, 14 de decembro, o alumnado de 2º de bacharelato participou nun encontro, que tivo lugar no noso centro, co Dr. Diego González Rivas, referente mundial en cirurxía torácica e transplante de pulmón.

A conversa tivo un dobre enfoque: por unha banda, abordou os aspectos científicos da súa innovadora técnica de cirurxía Uniportal VATS e, por outra, e xa dende un punto de vista máis persoal, o doutor relatou o inicio da súa vocación e as súas motivacións vitais centrando a súa intervención na importancia de que o alumnado se esforce, se forme e se motive para poder vivir con “paixón” aquela saída profesional e persoal pola que opte na súa vida.

O motivo da súa visita foi agradecer en persoa a colaboración do IES Miraflores, grazas aos máis de 6.000€ recadados na V Carreira da luz, nun dos grandes obxectivos da fundación que leva o seu nome que é poder dispoñer dunha unidade móbil coa que poder realizar, a través da súa técnica Uniportal VATS, aquelas cirurxías que non se poden abordar por falta de recursos en países en vías de desenvolvemento.

Publicación en arquivo adxunto dos listados de libros de texto por niveis para o curso 2023-2024.

NORMATIVA REGULADORA DO PROCEDEMENTO

– DECRETO 13/2022, do 3 de febreiro, polo que se regula a admisión de alumnado en centros docentes sostidos con fondos públicos que imparten ensinanzas de segundo ciclo de educación infantil, de educación primaria, de educación secundaria obrigatoria e de bacharelato reguladas na Lei orgánica 2/2006, do 3 de maio, de educación.

– Orde do 21 de outubro de 2022 pola que se desenvolve o Decreto 13/2022, do 3 de febreiro, e se regula o procedemento de admisión do alumnado nos centros docentes sostidos con fondos públicos que imparten ensinanzas de segundo ciclo de educación infantil, de educación primaria, de educación secundaria obrigatoria e de bacharelato reguladas na Lei orgánica 2/2006, do 3 de maio, de educación (códigos de procedemento ED550A, ED550B e ED550C).

– Instrucións da Dirección Xeral de Centros e Recursos Humanos sobre o desenvolvemento do proceso de admisión de alumnado en centros docentes sostidos con fondos públicos para o curso académico 2023-2024.

–  Resolución do 23 de febreiro de 2023, da Dirección Xeral de Centros e Recursos Humanos, pola que se fai público o resultado do sorteo ao que fai referencia o artigo 34 da orde do 21 de outubro de 2022.

POSTOS ESCOLARES OFERTADOS POR NIVEL E ETAPA PARA ALUMNADO DE NOVO INGRESO NON PROCEDENTE DE CENTROS ADSCRITOS

O PRAZO DE PRESENTACIÓN DAS SOLICITUDES DE ADMISIÓN (ED550B) COMPRENDE DO 1 AO 20 DE MARZO DE 2023 (AMBOS INCLUÍDOS).

As solicitudes de admisión (Anexo II e anexo II-bis) deben estar debidamente cubertas e asinadas por ambos proxenitores, excepto nos casos de violencia de xénero ou naqueles onde un dos proxenitores foi privado/a da patria potestade.

Ademais, coa solicitude de admisión, o/a proxenitor/a ou representante do alumnado deberá achegar a seguinte documentación:

– Copia do DNI do/a alumno/a e dos seus proxenitores.

– Certificación académica do curso no que está actualmente matriculado/a o/a alumno/a solicitante.

INFORMACIÓN A TER EN CONTA:

– A solicitude será única, terá carácter vinculante e a súa presentación implicará que son certos os datos indicados nela.

– Poderase presentar de forma presencial no centro docente indicado en primeiro lugar, en horario de 8:30 a 14:00,  ou preferiblemente por vía electrónica mediante o formulario normalizado dispoñible na aplicación informática admisionalumnado (https://www.edu.xunta.es/admisionalumnado), a través da sede electrónica da Xunta de Galicia, https://sede.xunta.gal.

– Na solicitude de admisión, poderase pedir hasta seis (6) centros por orde de preferencia e alegará os criterios de admisión que pretenda que se lle valoren. Dita solicitude dirixirase ao centro solicitado en primeiro lugar.

– Logo de presentar unha solicitude de admisión, para renunciar a ela deberá facerse expresamente, indicándoo no recadro correspondente da nova solicitude que deberá presentarse. A existencia dunha solicitude de admisión presentada en prazo sen renunciar expresamente á anterior poderá ser causa de perda de dereito a participar no procedemento nos termos previstos no artigo 8 da Orde so 21 de outubro de 2022 pola que se desenvolve o Decreto 13/2022, do 3 de febreiro.

– A admisión e a matriculación nun centro docente implica respectar o seu Proxecto educativo.

PRAZO DE PRESENTACIÓN DA DOCUMENTACIÓN XUSTIFICATIVA DOS CRITERIOS DE BAREMO ALEGADOS

Cando os postos dispoñibles en admisión no centro indicado en primeiro lugar non sexan suficientes para atender todas as solicitudes, o citado centro docente abrirá un prazo de 10 días hábiles, contados desde o día seguinte ao do remate do prazo para presentar as solicitudes, para que as persoas interesadas presenten de forma presencial nel a documentación xustificativa dos criterios de baremo alegados, para realizar a súa valoración e establecer unha orde de prelación.

Esta documentación complementaria presentarase presencialmente no centro docente. As persoas solicitantes responsabilizaranse da súa veracidade e os documentos deberán ser válidos e eficaces no momento da súa presentación e reflectir a situación familiar na data de inicio do prazo de presentación de solicitudes, agás a situación económica, que será do exercicio fiscal anterior en 2 anos ao ano natural da solicitude.

DATA DE PUBLICACIÓN DA LISTAXE PROVISIONAL DO ALUMNADO ADMITIDO E NON ADMITIDO: 25 DE ABRIL DE 2023

As familias poderán consultar as listaxes presencialmente no taboleiro de anuncios ou por vía electrónica a través da aplicación informática admisionalumnado, sendo necesario para consultalas o certificado dixital ou Chave365.

Poderase formular reclamación, no prazo de 5 días hábiles contados a partir do seguinte ao da súa publicación, ante o Consello escolar. Estas reclamacións entenderanse estimadas ou desestimadas coa publicación da listaxe definitiva.

DATA DE PUBLICACIÓN DA LISTAXE DEFINITIVA DO ALUMNADO ADMITIDO E NON ADMITIDO: 15 DE MAIO DE 2023

As persoas interesadas poderán interpor recurso de alzada ante a persoa titular da xefatura territorial, no prazo dun mes contado a partir do día seguinte ao da súa publicación. A resolución da persoa titular da xefatura territorial porá fin á vía administrativa e contra esta cabe interpor recurso potestativo de reposición ou recurso contencioso-administrativo.

PRAZO PARA FORMALIZAR A MATRÍCULA NA ESO E BACHARELATO: DO 23 DE XUÑO AO 7 DE XULLO DE 2023 (no mes de xuño indicarase na nosa web o día exacto para formalizar a matrícula por cursos).

ÁREA DE INFLUENCIA DO CENTRO E ÁREAS LIMÍTROFES

https://www.oleiros.org/documents/39407/58962a14-eb58-7dd9-44ac-92c6ed33d5b9

SERVIZOS COMPLEMENTARIOS:

TRANSPORTE ESCOLAR.

COMEDOR ESCOLAR.

A ANPA Miguel Hernández ofrece o servizo de comedor, seguindo o Decreto 132/2013, do 1 de agosto, polo que se regulan os comedores escolares dos centros docentes públicos, na modalidade establecida no artigo 2, punto 1 apartado e “Xestión do comedor escolar por entidades privadas sen ánimo de lucro, responsables da contratación e xestión integral do servizo, autorizadas para o efecto pola Consellería competente en materia de educación, coas que esta, no seu caso, poderá establecer fórmulas de colaboración mutua.”

O servizo de comedor, que ofrece a cantina e que conta con cociña propia, é xestionado pola ANPA tras a autorización por parte do Delegado Provincial da Consellería de Educación no ano 2001.

O servizo funciona de luns a venres, de setembro a xuño en horario de 14:10h a 15h. 

NA APLICACIÓN ADMISIONALUMNADO (https://www.edu.xunta.gal/admisionalumnado) PODERÁN CONSULTAR:

a) O cronograma coas datas dos trámites principais do procedemento de reserva, admisión ordinaria e matrícula.

b) A previsión de postos escolares dispoñibles e as súas modificacións.

c) A relación do alumnado de cada curso, co número da solicitude de admisión asignado pola aplicación no momento da súa gravación.

d) O estado de tramitación da súa solicitude utilizando o número de solicitude e o número de DNI da persoa solicitante.

e) A listaxe do alumnado con posto reservado e a listaxe provisional e definitiva do alumnado admitido coa puntuación total e do alumnado non admitido, utilizando calquera dos mecanismos de identificación admitidos pola sede electrónica da Xunta de Galicia, incluíndo o certificado dixital e Chave 365 (https://sede.xunta.gal/chave365).