Skip to Content

LUNS 20 DE MARZO. DÍA NON LECTIVO

O vindeiro luns, 20 de marzo, é o segundo día non lectivo escollido polo centro. Esta consideración de non lectivo terá como efecto inmediato que o prazo de admisión do alumnado para o curso 2023-2024 se prolongará ata o día 21 de marzo.

DÍA INTERNACIONAL DAS MATEMÁTICAS

Con motivo da conmemoración do Día Internacional das Matemáticas, 14 de marzo, o alumnado de 3º e 4º de ESO participou nunha charla sobre Aplicacións da Estatística, a cargo da matemática Mª José Ginzo Villamayor, que se centrou na súa investigación sobre algoritmos matemáticos na loita contra incendios e algoritmos relacionados ca onomástica (en particular apelidos característicos da zona e as súas relacións con outros aspectos como a historia, lingua etc.)
Mª José Ginzo (A Pontenova, Lugo), é Investigadora no Departamento de Estatística, Análise Matemática e Optimización (USC) dende o ano 2008. Licenciada en Matemáticas con especialidade en Estatística e Investigación Operativa, pola USC, cursou un posgrao en Estatística na Universidade de Porto (Portugal), o mestrado interuniversitario en Técnicas Estatísticas (USC) e obtivo o seu doutoramento en Estatística e Investigación Operativa en maio de 2022 coa tese titulada “Statistical Techniques in Geolinguistics. Onomastic modeling” baixo a supervisión da Prof. Dra. Rosa Mª Crujeiras Casais. Traballa como Técnico Superior de Investigación no Grupo Modelos de optimización, decisión, estatística e aplicación - Modestya da USC (USC) e ten impartido cursos en entidades como AGACA, Arcelor, Consello de Contas de Galicia, Misión Biológica de Galicia (CSIC), Tecnocom ou na proia USC, entre outros.

I CONGRESO DE BENESTAR EMOCIONAL E CONVIVENCIA

O martes 7 de marzo dúas profesoras do instituto asistimos en representación do centro ó Primeiro Congreso de Benestar Emocional, que se celebrou en Santiago de Compostela. Neste congreso falouse de temas moi importantes como saúde emocional na adolescencia, riscos na rede, prevención do racismo, depresión e saúde mental. Foron moitos os expertos que interviron así como profesionais dos ámbitos da saúde e da educación.

Unha das ponencias da que máis aprendemos foi a de Luis Rojas Marcos, quen nos falou de benestar emocional e de sentido de futuro, e que destacou a importancia de pedir axuda cando sentimos incertidume, estrés ou  desesperanza. 

De todas as ponencias obtivemos información para actualizar as estratexias de prevención de diversas formas de intolerancia nas aulas, que xa temos contempladas no noso Plan de Convivencia, e engadir outras para mellorar o benestar emocional de toda a comunidade educativa en xeral. 

Aquí vos deixamos unha das ideas de Rojas Marcos: As persoas que son solidarias e axudan aos outros teñen unha mellor saúde mental e por tanto unha mellor esperanza de vida”.



PRESENTACIÓN DO NOVO LIBRO DO PROFESOR FERNANDO DOMÈNECH

Este luns 13 de Marzo, o profesor Fernando Domènech presentou ante alumnado de 4⁰ ESO e 1⁰ Bach e numerosos compañeiros seus o seu último libro: a tradución e edición literaria de Siluetas na Area da escritora e viaxeira Isabelle Eberhardt.

Despois dun frugal bocata alí estiveron todos en grata conversa durante hora e media que pasou como un sopro.

Queremos felicitar ao alumnado asistente polo seu interese e o intelixente das súas preguntas e comentarios. Igualmente aos profesores Manuel Pousa e Jessica Pérez que souberon motivar á rapazada para se implicar neste precioso acto, e ao equipo da Biblioteca, coa arela de que actividades semellantes se repitan proximamente.

 

CONCURSO DE LEMAS DO SERVIZO DE NORMALIZACIÓN LINGÜÍSTICA DO CONCELLO DE OLEIROS

A alumna Clara Arévalo Martínez, de 2º ESO B resultou gañadora no Concurso de lemas convocado polo Servizo de Normalización Lingüísitica do Concello de Oleiros para a elaboración de material divulgativo co gallo do 8 de marzo.

Co seu lema: "Non son a túa lúa, nin reflicto a túa luz, nin xiro ao teu redor" realizáronse unhas fermosas pegatinas que tamén se poden empregar como marcapáxinas.

 

VISITA Á CORUÑA

Os estudiantes de Xeografía de 2°Bacharelato realizaron unha visita a distintas partes da cidade co fin de comprender as distintas tramas urbanas (Ensanche, Agra do Orzán, Barrio das Flores), os distintos equipamentos, a diferenciación social, a xentrificación e a transformación do centro urbano, así como a ubicación da área industrial.

FESTIVAL DE TEATRO GRECOLATINO

Alumnado de Grego, Latín e Cultura Clásica asistiu, como xa é tradicional, ao Festival de Teatro Grecolatino de Lugo. Ademais dun percorrido polo centro histórico da cidade, puideron desfrutar da representación de "Troianas" de Eurípides e "Cásina" de Plauto, interpretadas polos grupos Ave Fénix e Corzos Producciones de A Coruña.

Con motivo do I aniversario da campaña SOS CLÁSICAS, Fernando Domènech e a alumna de 4º de ESO Pandora Núñez subiron á escena para ler un manifesto en favor da campaña e do ensino das linguas clásicas.

ORIENTACIÓN ACADÉMICA 2º BACHARELATO

O mércores 1 de marzo o alumnado de 2º de bacharelato asistiu a unha charla de orientación no centro, impartida por Celso Rodríguez, Delegado Reitor de Ensino Medio, da Universidade de Santiago de Compostela.

Nesta sesión de 2 horas recibiron información sobre a oferta e organización da USC, así como da ABAU e do proceso de admisión na Universidade en Galicia. 
A actividade enmárcase dentro do Plan de Orientación Académica e Profesional do centro.

PROCESO DE ADMISIÓN DO ALUMNADO CURSO 2023-2024

Nos seguintes enlaces poden consultar toda a información relativa ao proceso de admisión do alumnado para o vindeiro curso 2023-2024.

NORMATIVA REGULADORA DO PROCEDEMENTO

  •  Decreto 13/2022, do 3 de febreiro, polo que se regula a admisión de alumnado en centros docentes sostidos con fondos públicos que imparten ensinanzas de segundo ciclo de educación infantil, de educación primaria, de educación secundaria obrigatoria e de bacharelato reguladas na Lei orgánica 2/2006, do 3 de maio, de educación.

 

  •  Orde do 21 de outubro de 2022 pola que se desenvolve o Decreto 13/2022, do 3 de febreiro, e se regula o procedemento de admisión do alumnado nos centros docentes sostidos con fondos públicos que imparten ensinanzas de segundo ciclo de educación infantil, de educación primaria, de educación secundaria obrigatoria e de bacharelato reguladas na Lei orgánica 2/2006, do 3 de maio, de educación (códigos de procedemento ED550A, ED550B e ED550C).

 

CALENDARIO DO PROCESO DE ADMISIÓN

POSTOS ESCOLARES OFERTADOS EN CADA NIVEL E ETAPA

 

 (*) O número de postos escolares por unidade reservados ao alumnado con necesidades específicas de apoio educativo (NEAE) no 1º curso da ESO será de 3.

As prazas reservadas a alumnado con NEAE non adxudicadas asignaranse ao resto do alumnado no procedemento de admisión ordinario (na listaxe definitiva ou, de ser o caso, na adxudicación subsidiaria).

PRESENTACIÓN DE SOLICITUDES

CRITERIOS DE ADMISIÓN

NOTAS INFORMATIVAS

CENTROS ADSCRITOS

            CEIP Plurilingüe Isidro Parga Pondal (Santa Cruz)

            CEIP Luís Seoane (Mera)

ÁREA DE INFLUENCIA DO CENTRO

En ESO, a área de influencia esténdese pola zona norte do Concello de Oleiros, e abrangue as parroquias de Dexo, Maianca, Serantes, Dorneda e gran parte da parroquia de Liáns, onde está situado o centro.

 En BACHARELATO, a área de influencia do centro abrangue todo o Concello de Oleiros.

                (ver mapa de escolarización)

 

SERVIZOS COMPLEMENTARIOS. 

   TRANSPORTE ESCOLAR.

Considerarase usuario con dereito a transporte escolar gratuíto o alumnado escolarizado en niveis de ensinanza obrigatoria cuxos domicilios se encontren fóra do núcleo urbano no que radique o centro escolar e, en calquera caso, a unha distancia deste superior a 2 quilómetros, calculada utilizando o itinerario máis directo á pé.

Para poder ser usuario con dereito ao servizo o alumnado deberá estar escolarizado no centro que lle corresponda, segundo a situación do seu domicilio e a distribución das áreas de influencia establecida, ou contar cun ditame de escolarización forzosa emitido pola Administración Educativa.

 

 

VIAXE DE ESTUDOS A GRECIA

Alumnas de 2⁰ Bach fixeron parte da Operación Alexandros, viaxe de estudos a Grecia organizado pola SEEC Galicia, que contou coa participación de 96 alumnos e profesores de Grego e Latín de 15 institutos de toda Galicia. Á expedición sumáronse dous graduados o ano pasado no noso centro, estudantes de Filoloxía Clásica que non puideron facer a viaxe o ano pasado por restricións da pandemia.

A viaxe tivo un resultado magnífico, apoiado en todo momento por un Helios resplandecente que non nos abandonou nin un minuto.
Visitamos Delfos, Meteora, Tesalónica e os sitios arqueolóxicos macedónicos, Volos, Tebas e Atenas.
Distribuir contido


by Dr. Radut