RESEÑA DO LIBRO ARS COQUENDI

Acceso ás fotos no enlace

O libro Ars Coquendi é o resultado final do traballo realizado polo alumnado de 1º ESO A e D, coordinado pola súa profesora de Lingua Galega e Literatura Ma Teresa Pastor Novo, quen compilou esta variada e noxenta carta de pratos. Daquela, puidéronse ver as receitas expostas no interior dunha desacougante caixa negra, nunha terrorífica mesa, instalada baixo o taboleiro do EDLG, no 1º andar, que agora aparecen reunidas neste libro. A dita profesora ideou un pretexto para contextualizar este receitario, creando unha ficción literaria, materializada nun microrrelato titulado O manuscrito Ars Coquendi. Nel, a docente inventou o personaxe dun antigo conserxe, alma en pena deste edificio, que foi gardando as receitas de antigos alumnos e alumnas. Porén, o que non contaba foi que, no seu descanso eterno, fose molestado por unha nova xeración.

Como broche de ouro, a profesora antes nomeada ideou unha curtametraxe, onde a realidade deste centro se mestura con esta ficción, narrada polo propio conserxe.

O libro Ars Coquendi, xunto con outros exemplares moi antigos e mais o microrrelato O manuscrito Ars Coquendi, pódese ver na vitrina da planta baixa do edificio histórico, ao lado da Biblioteca.

Seica alumnado e profesorado adoitan ás veces escoitar pasos e bater ovos, como se o espírito daquel vello conserxe estivese entre nós .......

Ma Teresa Pastor Novo

(Profesora de Lingua Galega e Literatura)