blogue debiblioteca

O día 23 de abril celébrase o Día Internacional do Libro, que conmemoramos con varios paneis explicativos expostos no0 vestíbulo do instituto, nos que se inclúen referencias a San Xurxo e os seus modelos clásicos. Deixámosvos aquí unha mostra deses paneis.

O pasado día 30 de xaneiro, dentro das actividades da biblioteca, vicedirección e o Equipo de Dinamización Lingüística, para conmemorar o Día da Paz, o noso alumnado de 2º da ESO elaborou unhas pombas de papel coas que decoramos o taboleiro do vestíbulo e a entrada á nosa biblioteca. Estas pombas levaban incorporadas frases en contra da violencia e a favor da paz, con mensaxes optimistas e de esperanza elixidas polo propio alumnado.

Durante a Hora de Ler, en todas as aulas da ESO léronse en voz alta textos de diversos autores relacionados coa Paz.

Máis información na páxina principal do IES As Telleiras.

O pasado 10 de novembro o noso alumnado do Clube de Lectura de 1º e 2º da ESO representou por segunda vez na Bibliotelleiras a adaptación do conto Moucho e Cuquiña, da escritora Paula Merlán e do ilustrador Antonio Seijas.

O noso centro educativo recibiu a visita de cerca dun centenar de escolares de 6º curso de educación Infantil e 1º e 2º de educación Primaria dos colexios Ayala, Ponte de Xuvia e Piñeiros, nunha xornada inolvidable para moitos deles.

Máis información no Facebook de Educación Vial do Concello de Narón

11 DE SETEMBRO, XORNADA DE BENVIDA Á BIBLIOTECA AO ALUMNADO DE 1º ESO E 1º BACHARELATO DE NOVA INCORPORACIÓN.

Para o alumnado de 1º ESO realizouse durante toda a mañá do luns 11 de setembro, data de inicio do curso, unha xornada de presentación e un percorrido polo centro (Dirección, Club de Ciencias, Zona de xogos...), con distintas actividades encamiñadas a dar a coñecer as instalacións e as distintas propostas que oferta o centro.
No marco desta xornada o alumnado de 1º ESO  levou  a cabo a tradicional actividade “Coñece a túa Biblio” e realizou unha visita guiada pola Biblioteca onde se lle mostraron as instalacións, se lle deron a coñecer as normas básicas de funcionamento,  se lle informou das propostas de actividades que se levan a cabo ao longo do curso e se lle animou a formar parte dos Clubs de lectura que temos en marcha.

Os horarios de visita foron os seguintes:

1º ESO A (12.30-12.50)

1º ESO B (11.20-11.40)

 1º ESO C (12.55- 13.20)

1º ESO D (11.45-12.10)

Ao mesmo tempo estivemos encantados de facilitarlles aos alumnos e alumnas calquera tipo de información que solicitaron, resolverlles  dúbidas e mesmo fixemos algunhas fotos que quedarán de recordo desta ocasión.
Organizados por clases e acompañados do seu profesorado, explicámoslles a profunda transformación que experimentou a biblioteca hai dous cursos con motivo das obras levadas a cabo pola Consellería de Educación; mostráronse moi curiosos ao saber que gran parte dos espazos que forman hoxe a nosa Bibliotelleiras foran en tempos cuartos e dependencias da “casa do conserxe”, zona que só foi utilizada a tal fin durante uns poucos meses cando o instituto acababa de ser inaugurado aló polo ano 1985.
Chamoulles tamén moito a atención a zona exterior da biblioteca, á que nós cariñosamente  chamamos a “zona chill out”, que esperamos que ao longo deste curso poida ser habilitada e co mobiliario axeitado para ser usada como un espazo de lectura informal, ao aire libre, e onde sexa posible levar a cabo ademais actividades diversas: reunións dos clubs de lectura, encontros con autores e autoras, presentación de libros...
Tamén esa mesma mañá do 11 de setembro o alumnado de 1º Bacharelato de nova incorporación tivo ocasión de percorrer o centro para familiarizarse coas instalacións e un dos puntos de interese foi a visita á biblioteca, onde se lles informou do uso dos espazos, das normas básicas de funcionamento e se lles respondeu ás dúbidas que foron xurdindo durante a visita.
Así mesmo, durante a mañá do 7  de setembro, o profesorado novo que se incorporou ao centro realizou unha visita á biblioteca acompañado dos membros do Equipo da Biblioteca para coñecer as instalacións, os fondos documentais e as posibilidades que a nosa Bibliotelleiras poida ofertar para o seu labor docente e tamén persoal.
Cómpre destacar que estas visitas resultaron moi interesantes para o alumnado que destacou a amplitude da biblioteca, a boa disposición, luminosidade e excelente ventilación de todos os espazos; así mesmo os máis pequenos quedaron sorprendidos pola grande cantidade de libros e o orde e clasificación dos mesmos.
Cremos que foi unha xornada moi agradable e para nós unha ocasión especial de recibir a todo o alumnado e profesorado que se incorporan este curso por primeira vez ao centro.
Só nos queda dar a benvida a todos os usuarios e usuarias da Bibliotelleiras e animalos a participar en todas actividades que se levarán a cabo ao longo do curso en cooperación coa Vicedirección e os distintos Departamentos que sempre se amosan dispostos a colaborar coa Bibliotelleiras.

 A tarde do martes 20 de xuño os Clubs de Lectura da Bibliotelleiras tiveron de novo a oportunidade de compartir dúas horas de excelente conversa, anécdotas, risas e bombóns co noso “autor de cabeceira”, Juan José Lada Vilariño, autor da novela El oro de Himmler, a terceira entrega da triloxía que comezou con El tesoro de Artabria, continuou con Las minas de Santa Comba e remata con esta. Tamén desta vez, como xa pasara o curso pasado, as dúas horas de reunión pasaron voando.

Houbo tempo para falar con Juan José sobre os múltiples aspectos da novela, de formularlle as dúbidas que a lectura foi xerando ao longo do curso, de comentarlle as impresións que a historia foi deixando en nós, lectores e lectoras, e ata de preguntarlle se esta ía ser a derradeira entrega ou só a última.

Fíxonos saber que xa ten lista unha nova novela e que, cun xiro de guión, incluirá “sangue”, aspecto que, ávidos e ávidas de suspense e thiller, deixounos xa con ganas de comezar a devorala.

Queremos desde aquí agradecerlle de todo corazón a enorme amabilidade e cortesía coas que responde sempre ás nosas invitacións, os agasallos que sempre trae consigo e a magnífica oportunidade que nos ofrece ao poder contar “en persoa persoalmente”, como diría Catarella, o personaxe de Andrea Camilleri, para compartir con el a nosa experiencia lectora.

Non quixemos deixar pasar la ocasión de facerlle entrega da orixinalísima camiseta que a nosa Vicedirectora, dona Estefanía Mosquera, deseñou este curso e que é un orgullo para todos os e as “Telleiros e Telleiras” que foron e son parte da historia do noso centro.

Así mesmo reiterámoslle o ofrecemento que xa lle fixeramos desde a Bibliotelleiras, tanto a el como a todos e todas os integrantes do colectivo GAF, Grupo de Autores de Ferrolterra, na tertulia literaria que se levou a cabo na Biblioteca Universitaria Casa do Patín de Ferrol no mes de marzo pasado e durante a cal nos fixeron entrega de exemplares das súas obras. Podedes consultar a reseña da tertulia na seguinte ligazón.

A idea é poder levar a cabo, con motivo da celebración do 24 de outubro, “Día das Bibliotecas”, no Salón de actos do centro un encontro de presentación do colectivo para dar a coñecer o labor deste grupo de seis autores de diferentes concellos da zona decididos a sumar forzas para difundir así, de forma colectiva e con apoio mutuo, as súas respectivas obras literarias, ambientadas en localizacións de Ferrolterra, Eume e Ortegal.