No mes de decembro, o alumnado de 2º de ESO do CPI Alcalde Xosé Pichel participou nunha actividade consistente en escribirlles cartas ás persoas que conviven na residencia de maiores de Carballo, con tres mensaxes principais: gabarlles o seu esforzo polos meses de illamento e falta de contacto coas súas familias, felicitarlles as festas do Nadal e prometerlles unha futura visita en canto as circunstancias o permitan.
A mediados de xaneiro recibimos no centro as cartas de respostas dos e das maiores, nas que nos contaban como era o seu día a día na residencia, as actividades que desenvolven, a súa esperanza de que o confinamento xa estea chegando á súa fin e a gana que teñen de que a visita dos rapaces e rapazas do instituto de Coristanco se produza canto antes, para coñecérense en persoa e seguir afondando na súa xa nacente amizade.
Moitas e moitos dos maiores compartiron co alumnado as súas historias persoais, algo que puxemos en común nas dúas aulas de 2º de ESO, onde todos os rapaces e rapazas puideron coñecer os contidos das cartas recibidas. Algunha bágoa aflorou ao coñecer as difíciles circunstancias en que se desenvolveu a vida destes maiores.
Desde o CPI Alcalde Xosé Pichel queremos agradecerlles aos residentes e ás persoas do cadro de persoal da residencia a súa resposta a esta preciosa actividade, na que, por riba do diálogo interxeneracional, se erixe a conexión entre persoas que, malia a súa diferenza de idade, comparten desexo e esperanzas.
En canto as restricións sanitarias o permitan, iremos cumprir coa visita prometida. Estamos desexando facelo!
Departamento de Lingua e Literatura Galegas – Equipo de Dinamización da Lingua Galega.
PREMEDE NESTA IMAXE PARA LER AS CARTAS DE RESPOSTAS DOS E DAS MAIORES.
PREMEDE NA FOTO PARA VER O ÁLBUM CON EFECTO LIGHTBOX
Álbum: SECUNDARIA 20/21 -> CARTAS DE RESPOSTAS DAS PERSOAS RESIDENTES NA RESIDENCIA DE MAIORES DE CARBALLO
