Este venres 3 de decembro conmemórase o día Internacional da Diversidade Funcional. Como centro comprometido coa atención á diversidade e o respecto ás diferenzas individuais queremos aportar o noso graíño de area e organizamos unha pequena exposición adicada a todos aqueles que empregan diferentes sistemas de comunicación como son o Braille, a Linguaxe de Signos ou os pictogramas. Os nenos e nenas do colexio podemos tocar as letras en Braille (en papel especial para persoas con discapacidade visual ou a maior tamaño como en caixas para 6 ovos que se empregan cos nenos e nenas pequenos que aprenden Braille), podemos ver como se signan as diferentes letras do alfabeto ou contos elaborados con pictogramas para os que entenden mellor a información a través de imaxes.
Onte conmemoramos no centro o día Internacional contra a violencia de xénero con cancións como a de Malú e Manu Carrasco "Que Nadie" que nos acompañou nas entradas e saídas, o conto para infantil "O libro dos porcos" ou tarxetas vermellas contra o maltrato.
No centro consideramos que a mellor forma de actúar contra a violencia de xénero é a prevención dende as primeiras idades e a colaboración familiar é fundamental nesta tarefa polo que enviamos para as familias unha guía con recomendacións de lecturas coeducativas e nas que están presentes os valores de igualdade, corresponsabilidade, ec.
O día 20 de Novembro conmemórase o día dos Dereitos dos nenos e das nenas. Na galería podedes ver as exposicións que organizamos no cetro para celebrar ese día, preme AQUI.
Por segundo ano poñemos a funcionar a Rede de Alumnado Mediador (RAM) do CEIP de Quiroga. As alumnas e alumnos de 6º iniciarán o martes 16 de Novembro o Obradoiro de formación antes de empezar a exercer como mediadores e mediadoras no tempo de lecer nos pequenos conflitos diarios.
O obradoiro terá lugar no tempo de lecer da mañá os martes e os xoves de cada semana.
Dende o centro queremos agradecer o interese destes nenos e nenas por colaborar á hora de manter un bo clima de convivencia no centro.
O primeiro ciclo de Educación Primaria é un momento crucial para consolidar a aprendizaxe da lectura e formar hábitos lectores entre o alumnado. Neste proceso a colaboración familiar é fundamental, por iso, dende o Departamento de Orientación elaboramos unha serie de orientacións que pretenden axudar as familias nesta tarefa.