Iniciar sesión: Acceso

Liga de baloncesto

No mes de novembro, fixemos unha liga de baloncesto no tempo de lecer da maña.

Os martes xogou o alumnado de 1º, 2º e 3º; un total de 13 alumnos/as distribuídos en 4 equipos.

Os xoves 4º, 5º e 6º, 16 alumnos/as que formaron 4 equipos.

Os equipos son mixtos, contando polo menos cun neno e cunha nena; ademais deberán ter un participante de cada curso (por exemplo, un neno/a de 4º, un neno/a de 5º e un neno/a de 6º).

En cada recreo xogáronse dous partidos de 10 minutos. O sistema que levamos a cabo foi o de liga, onde todos os equipos se enfrontaron entre si ao longo do mes de novembro. O último martes e xoves do mes, fixemos un partido libre para despedir esta primeira liga de baloncesto do colexio.

O alumnado estivo moi motivado ante esta iniciativa, con gañas de participar. Aproveitamos para fomentar este deporte, para dar a coñecer aos nenos/as as súas regras, aspectos básicos do mesmo..

 

Ante a boa acollida que tivo, a ilusión que xerou nos nenos/as, o que disfrutaron…non descartamos que nos próximos meses o baloncesto sexa de novo o protagonista dos noso tempo de lecer. 

Tempos de lecer saudables

Dende o día 1 de outubro buscamos que os tempos de lecer sexan máis activos, máis saudables, nos que a actividade física estea presente. Para iso organizamos recreos saudables que se levarán a cabo durante todo o curso.

Temos 3 zonas co seguinte material:

  

ZONA 1: Patio cuberto pequeno → 1 Pelota baloncesto, 2 pelotas espuma, 3 cordas.

 ZONA 2: Pista polideportiva descuberta 1 Pelota de fútbol, 1 pelota de baloncesto, 1 pelota balonmán.

 ZONA 3: Parte descuberta → 2 Pelotas voleibol, 1 pelota espuma (brilé), 3 aros grandes, sacos.

 ZONA INFANTIL: (Columpios e areeiro) 1 Pelota espuma, 3 pelotas plástico, 5 aros pequenos.

O alumnado está distribuído en 3 grupos: 1º e 2º, 3º e 4º e 5º e 6º. Rotarán seguindo esta táboa:

 

ZONA 1

ZONA 2

ZONA 3

LUNS

1º / 2º

3º / 4º

5º / 6º

MARTES

LIBRE

MÉRCORES

3º / 4º

5º / 6ª

1º / 2º

XOVES

LIBRE

VENRES

5º / 6º

1º / 2º

3º / 4º

 

Os luns, mércores e venres cada grupo xogará na súa zona co material que lle corresponde.

Os martes e xoves pódese xogar en calquera das zonas, con calquera material e con calquera compañeiro /a.

O material de cada unha das zonas cóllese ao comezo do  tempo de lecer (tanto no da mañá coma no do comedor) e débese deixar recollido ao rematar.

Os días que chova non se seguirá esta organización, dadas as limitacións dos espazos.

 

Levamos dous meses con esta actividade e a valoración está sendo moi positiva: conseguimos que o alumnado faga máis actividade física durante os tempos de lecer, que amosen máis interese polo exercicio, que se relacionen con todos os alumnos/as do centro…

O exercicio físico proporciónanos moitos beneficios: mellora a nosa saúde, as nosas relacións sociais, axúdanos a relaxarnos e a durmir mellor, a aumentar a nosa forza, resistencia e axilidade.

Fortalece os ósos e músculos, é bo para o corazón e os pulmóns…

 

“O mellor camiño é a actividade física; pona na túa vida”

Día Mundial da NON Violencia de Xénero

O mércores 25 de novembro celebramos o Día MUNDIAL DA NON VIOLENCIA DE XÉNERO; debe ser un Día para reflexionar e concienciar sobre esta lacra que atemoriza á sociedade, e ademais facendo fincapé en que todos os días debemos loitar con forzas para frear a Violencia, para dicirlle NON.

A biblioteca estivo presente na celebración deste día

O alumnado de leu “Nera, a Ferreira”, de Imelda Barrio.

A IGUALDADE é temática que recorre as páxinas deste interesante libro. Nera naceu nun momento especial; era xusto cando o Consello de fadas se reunía para outorgar un desexo á persoa que chegase ao mundo nesa noite. Pero, cal sería o mellor desexo para conceder? Nera, quería ser a primeira muller ferreira, loitar pola igualdade entres homes e mulleres; cando xogaba coas amigas ás guerras ela quería loitar e non quedar no castelo peiteándose…

Imos vendo como Nera crece coas ideas claras, reivindicándose, loitando pola igualdade, pola xustiza…chega a ser ferreira e ademais xefa.

Os alumnos/as de 5º e 6º leron A Lagoa das nenas mudas, de Fina Casalderrey.

Amina vaise vivir a un lugar remoto do que descoñece ata o idioma. Un día chega ao seu novo colexio e decátase de que todas as nenas visten coma ela, peitéanse coma ela…son de súpeto igualiñas a ela. A mestra de inglés fai unha impresionante revelación que Amina vai descifrando grazas aos debuxos da súa amiga Ío, unha rapaza xordomuda.

Relátanos a emigración, o rexeitamento e as dificultades que sofren moitos emigrantes. A amizade de Amina e Ío amosa que, tantas veces a posibilidade da comunicación está por riba das palabras. A convivencia no eido escolar, a comunicación extralingüística, ou o coñecemento da cultura africana son algúns dos temas abordados nesta novela.

Estas obra permitíronnos afondar neste tema, reflexionar co alumnado, extraer conclusións moi positivas.

Así que esta semana  falamos cos alumnos/as sobre a Violencia de Xénero: indagamos nos seus coñecemento previos, para a partir de aí traballar neste tema e sacar o maior proveito posible.

Con todas as ideas elaboramos dous murais no que pretendemos que queden reflexadas todas estas aprendizaxes, boas intencións…e neles puxemos as nosas reivindicacións.

-Se doe non é amor

-Que as mans se usen só para acariñar

Sabemos que a violencia non é a solución; precisamos igualdade, amor, empatía, comprensión, tolerancia…

"Biosferos e Biosferas"

O martes 24 fomos “Biosferos e Biosferas” nun obradoiro levado a cabo por unha persoa de ADEGA, Asociación Defensa Ecolóxica de Galicia,

Esta asociación ecoloxista, cuns 40 anos de existencia,  ofreceunos un obradoiro a través dun concurso para coñecer como coidar mellor a natureza, o que contamina máis, como defender o medio natural xa que non temos outro…

Fixemos dous grupos : 1º e 2º e 3º, 4º, 5º e 6º. Á súa vez había diferentes equipos que ían conseguindo puntos a medida que superaban diversas probas.

A primeira parte do xogo, centrouse nunhas preguntas sobre anfibios; son coa súa presenza os indicadores dun nivel aceptable de contaminación. Preguntas sobre o seu hábitat, características…

A seguinte actividade consistía en clasificar por un lado especies invasoras e por outro lado as autóctonas. Un grave problema ocasiónano as especies que invaden os nosos ecosistemas e os alteran.

Aprendemos que son especies invasoras a mimosa, o cangrexo americano, herba da pampa, faisán, eucalipto…

Logo, xogamos ao rosco de pasapalabra; un tarefa que motivou moito ao alumnado propiciando neles un alto nivel de involucración. Saíron palabras como Adega, bosque, xoaniña, eucalipto, ecoloxista…

Era o momento da proba “pintáronme”; consistía en completar palabras con algunhas letras. Se fallan, o equipo que teñen ao seu carón pódelles pintar unha raia na cara.

A última proba, “axustar as gafas”; hai que adiviñar que animal ou planta se escondía na imaxe. Se precisaban ampliar máis, a puntuación que obtiñan era menor. Puidemos ver cornos dun cervo, bolboretas, xabaril, vaca louca, píntega, curuxa.

O obradoiro durou unha hora para cada un dos dous grupos; como podedes ver serviunos para adquirir novo coñecementos, para concienciarnos da importancia de coidalo…

A disfrutar do medio natural, non temos outro

Saída a Lugo

As saídas sempre son un momento de riqueza, de ver cousas novas, de aprender fóra da aula, de compartir momentos emotivos entre mestres e alumnos/as.

Hoxe, foi un día deses. O noso itinerario foi o seguinte:

• Lagoa de Cospeito

• Casa – Museo Manuel María (Outeiro de Rei)

• Castro de Viladonga (Castro de Rei)

Saímos ás 9.30h do colexio, dirección Lugo. A viaxe pasouse rapidamente entre ilusións, cancións, risas…

A Lagoa de Cospeito foi a nosa primeira parada. Aproveitamos para merendar algo rápido e iniciamos a marcha. Este ano o Proxecto Voz Natura céntrase nos ecosistemas, así que este foi o noso punto de partida, a maneira de iniciarnos neste proxecto.

Fixemos dous grupos: Infantil, 1º, 2º e 3º. No outro grupo ía 4º, 5º e 6º.

O primeiro grupo fixo unha ruta máis curta, coñeceron o entorno, a fauna, contáronlles un conto… O alumnado de 4º, 5º e 6º fixo unha ruta un pouco máis longa.

Foi incrible facer sendeirismo entre tanta tranquilidade, disfrutar da natureza, respirar aire puro…aprender tantas cousas.

Este humidal intégrase dentro da Rede Natura 2000 ao formar parte da Zona Especial de Conservación chamada Parga – Ladra – Támoga. Alberga unha importante representación de hábitats húmidos, moitos deles tipificados como de interese europeo.

Entre os valores máis destacados débense destacar os queirogais e herbazais húmidos e os hábitats de auga doce estancada.  As accións de conservación na Lagoa céntranse na creación de charcas estacionais e na eliminación de especies exóticas.

Alberga especies en perigo de extinción coma o Cardiño das Lagoas.Trátase dunha pequena planta acuática considerada como especie prioritaria.

Despois, dirixímonos a Outeiro de Rei. Visitamos a Casa – Museo de Manuel María. Este ano o Día das Letras Galega dedícaselle a este poeta galego; destaca a súa loita por Galicia, polo noso idioma…Un referente no panorama literario galego. A finais dos anos 60, xunto coa súa dona Saleta Gai, crearon a Librería Xistral en Monforte, e pouco despois a editorial co mesmo nome.

Esta visita serviunos para coñecer máis sobre Manuel María. Ademais preparar a nosa viñeta para o calendario Estiño, que este ano se centra na figura deste gran autor. O noso centra indagará sobre a súa etapa en Monforte.

Achegábase o momento de repoñer forzas e aproveitamos a Área Recreativa de Santa Isabel, a uns 300 metros do centro de Outeiro de Rei.  Tocaba un merecido descanso, aproveitando para comer, xogar un ratiño.

A última parada do día levounos ao Castro de Viladonga, en Castro de Rei. Trátase dun poboado fortificado de època Castrexa e Galaico – Romana. Por tanto, viaxamos ao pasado, coñecemos como vivían os nosos antepasados.

Vimos o Museo, e logo subimos ao Castro para adentrarnos nel, ver os seus restos, coñecer como eran as vivendas, como as construían…

Cos restos atopados reconstruíron como era a vida no Castro. Situábase nun outeiro, protexido por unha gran muralla. Vivían entre 200 e 250 persoas. As súas vivendas e demais construcións anexas dispoñíanse en grupos deixando rúas para circular persoas, animais e medios de transporte.

Moi ao noso pesar, era hora de regresar a Brollón. Merendamos e comezamos a viaxe de volta. Non paramos en todo o día, aínda así tiñamos forzas para volver no bus cantando, rindo…

Un día moi produtivo, que aproveitamos para ampliar os nosos coñecementos, para convivir…

“Dime y lo olvido, enséñame y lo recuerdo, involúcrame y lo aprendo”

Benjamin Franklin

Saída a Lugo (Martes 10)

O próximo martes, día 10, faremos a primeira saída deste curso. Será a Lugo e visitaremos:

-       Lagoa de Cospeito

-       Casa – Museo de Manuel María

-       Castro de Viladonga

O itinerario será o seguinte:

• 9.30h Saída do centro

• 11h Chegada á Lagoa de Cospeito

Faranse dous grupos:

-       Infantil, 1º e 2º: Recorren un anaco do bosque mentres os monitores lles dan explicacións.

-        3º, 4º, 5º e 6º:  Ruta circular de sendeirismo polo entorno da lagoa.

• 13h Visita á Casa- Museo de Manuel María (Outeiro de Rei)

• 14h comida

• 16h Visita ao Castro de Viladonga

• 17.30h saída de Lugo e chegada ao centro entre as 18.30h – 19h

Magosto

Onte, venres 6, celebramos o Magosto. O tempo deunos unha tregua e puidemos disfrutar desta celebración, con tanta tradición en Galicia.

Queremos agradecer ás familias a súa colaboración para que fose posible o Magosto, tanto coas castañas como coa leña.

Primeiro, sobre as 12h preparamos as castañas para poder asalas. Ao mesmo tempo Paco e os seus alumnos/as prenderon o lume.

Pola tarde, recollemos ditos populares, refráns, adiviñas sobre a castaña, sobre o magosto, para realizar un mural.  A verdade é que temos no cole unhas grandes debuxantes. Aproveitamos así para traballar co alumnado a importancia da castaña en Galicia, o que significa para os galegos.

Ás 14:45h chegou o momento ansiado de comer castañas, de compartir no patio momentos de risa cos compañeiros/as, de xogar…As castañas estaban moi ricas, no punto xusto.

Finalmente…o carbón pasou a un primeiro plano e puxémonos un pouco negros. As nosas caras de ledicia dino todo.

Foi un día moi positivo, no que aprendimos, compartimos, rimos, xogamos, medramos como persoas.

"As castañas queren en agosto arder e en setembro beber"

Comeza o novo curso

Chegou setembro e abríronse as portas do cole de novo...Os mestres xa estamos traballando e cargando as nosas de mochilas de ganas, ilusión,traballo, paciencia, novos retos, proxectos…

Aproveitamos para darvos a benvida aos nen@s que chegades ao cole e dicirvos a tod@s que calquera cousa que precisedes non dubidedes en poñervos en contacto con nós.

O xoves 10 comeza o curso 2015 -2016, e estamos seguros de que será un bo ano para tod@s.

reunión xeral de pais cambiase e será o vindeiro martes 6 de outubro as 16:00h.

Rematamos coa seguinte frase de Miguel Rojas Sánchez:

 

 

"La educación es el vestido de gala para asistir a la fiesta de la vida".

 

CONVIVENCIA NO CENTRO DE DÍA

O pasado xoves, día 11 vivimos uns momentos moi emotivos, cheos de ilusión, de ensinanzas.

Como en anos anteriores, visitamos aos  nosos veciños do Centro de Día para compartir tod@s un anaco da mañá.

Os nosos maiores son grandes persoas, cun corazón moi xeneroso e cargado de experiencia, de vivencias, de sensacións, de emocións…Temos que recoñecer que calquera palabra de agradecemento para eles se queda curta.

Quedamos verdadeiramente abraiados coa representación que nos fixeron da obra “A tía lambida”.

Despois, foi o turno para que algúns nenos contaran contos escritos por eles para o Nadal ou para as Letras Galegas.

Tiñan un agasallo preparado  para tod@s nós:  un marcapáxinas  cunhas palabras que animan á lectura, esa ventá que temos tan preto e que nos permite ollar o mundo, viaxar por el…

Marchamos coa sensación de que o tempo voara, de que valeu moito máis esta hora con eles que moitas horas no centro; foi unha clase maxistral.

Querémoslles dar as grazas pola súa hospitalidade, polo seu cariño, por todas as cousas positivas que nos transmiten, por tantas e tantas cousas

Grazas a eles e a tod@s os traballadores co Centro de Día por esta mañá e por outros moitos momento ao longo deste curso.

 

Vémonos pronto.

Excursión Voz Natura

O sábado 6 chegou a xuntanza anual dos colexios participantes no Programa Voz Natura. O lugar de encontro foi  Culleredo.

Saímos do colexio ás 9, e en torno ás 11 horas estábamos na Coruña, con gañas de baixar do autobús e disfrutar do tan ansiado día que tíñamos por diante.

Pola mañá pasámolo moi ben nas colchonetas, montamos a cabalo e vimos a actuación do Xabarín Club xunto coa entrega de premios dos coles gañadores desta edición.

Ás 14h era momento de facer unha parada e repoñer forzas, para afrontar con enerxía o resto do día. Comemos todos xuntos. De postre tivemos algodón de azucre.

Logo deste descanso,na xornada de tarde,  vimos os traballos de todos os colexios, fixemos un taller de prensa e incluso nos fixeron  debuxos. Tamén houbo tempo para a maquillaxe, globoflexia, para facer chapas…Gustonos moito ver o helicóptero da Garda Civil, os coches de tráfico…Fixéronnos un carné de tráfico.

A iso das 18:30 merendamos para poñernos rumbo a Brollón. Chegamos ao colexio ás 21 h aproximadamente, logo dunha xornada de convivencia, de bos momentos, de xogos…

 

Volveremos o próximo curso…

Distribuir contido