Rematou o trimestre e con el tamén rematamos o noso obradoiro de pintura: No país das cores vivían a amarela, o vermello, a cor azul, o branco e a negra. Pero o curioso é que non se coñecían... O señor vermello, por exemplo, que vivía na súa casa vermella, coa súa horta vermella chea de amorodos e tomates, atopouse un día á señora amarela que andaba paseando no seu coche amarelo chillón. Ao ver ao señor vermello parou contentísima de poder coñecer por fin a alguén. Déronse a man para presentarse e zas!!! De súpeto apareceu a señora laranxa! Así comeza a nosa historia do país das cores que nos acompañou durante estes meses de clase. Fomos coñecendo o resto das mesturas grazas aos curiosos encontros destas protagonistas principais, as cores básicas ou primarias. Con elas divertímonos mesturando, pintando con pinceis, coas mans, os dedos, con rolos, esponxas, estampando obxectos, con ceras e rotuladores, facendo debuxos cooperativos, diferentes tonalidades dunha cor,... Fixemos algunhas primeiras experimentacións con cada unha das cores obtidas das mesturas, pero logo fomos deixando voar a nosa creatividade cos nosos cadros libres e con novas e orixinais mesturas. Tamén elaboramos un pequeno poemario co que, ademais de achegarnos ao mundo da rima, fomos descubrindo o nome escrito destas cores. Agora toca usar todo o aprendido no novo recuncho de pintura que nos agarda á volta das vacacións!
