Máis de trinta docentes de música de ensino secundario de Galicia mellorarán a partir de hoxe a súa formación grazas ao curso ‘A ópera nos séculos XIX, XX e XXI: últimas investigacións’, organizado pola Consellería de Educación e Ordenación Universitaria. A profesora de Musicoloxía da Universidade de Oviedo, María Encina Cortizo, e o compositor José María Sánchez Verdú, ambos os dous prestixiosos profesionais da materia, serán os relatores desta cita.

Esta actividade de formación para o profesorado constitúe unha oportunidade única para a actualización dos coñecementos nun aspecto que é parte fundamental nos currículos da materia en secundaria e bacharelato, xa que a ópera e as súas diferentes vertentes é un dos ámbitos nos que máis se ten investigados nos últimos anos. Precisamente son estes estudos, que teñen mudado radicalmente o coñecemento que se ten deste xénero, os que aconsellan a realización do curso. Un dos seus obxectivo é pór en valor o papel que tivo realmente a música vocal española no entorno europeo, e a cantidade e calidade do obras, que ata hai ben pouco permanecían esquecidas, a pesares de constituír verdadeiros tesouros do patrimonio artístico europeo.

Fomento da formación continua

Durante as catro xornadas das que se compón o curso -16, 17, 23 e 24 de abril-  os distintos expertos analizarán para o profesorado de música de Galicia o alcance das súas investigacións. Deste xeito, os relatorios xirarán en torno á divulgación dos resultados do labor de recuperación e catalogación de máis de 45.000 zarzuelas, dun valor musical incalculable, e un importante número de óperas do século XIX.

Así mesmo, os relatores explicarán o proceso de recuperación da ópera da Restauración así como de da figura dos compositores e as óperas máis importantes –e descoñecidos- da España do século XIX. A importancia deste traballo queda manifesta naqueles títulos que despois da súa recuperación, están a ser estreados e divulgados no resto de Europa, caso da ópera de Ramón Carnicer 'Don Giovanni', que ten sido recuperada, e cuxa importancia fixo que despois fose programada no Festival Rossini de Pesaro, entre outros festivais europeos. Neste mesmo caso atópase tamén a ópera 'Cristorofo Colombo', ou 'La mort du Tasse', que escribiu Manuel García para la Grand Opéra de París.

Ademais, o profesorado participante terá a oportunidade de coñecer e analizar o repertorio operístico contemporáneo, que constitúe un fito fundamental do repertorio mundial.

Relatores de prestixio

As distintas actividades formativas deste curso serán impartidas pola profesora de Musicoloxía da Universidade de Oviedo e responsable da edición crítica e da recuperación de máis de 10 óperas e zarzuelas do século XIX, María Encina Cortizo. Na tarefa docente estará acompañada polo compositor, Premio Nacional de Música e Profesor de composición en Dusseldorf, José María Sánchez Verdú; quen ten ademais estreado 5 óperas, e dado numerosas conferencias en Europa e Hispanoamérica sobre a creación vocal dos séculos XX e XXI.

Coa organización desta actividade, a Consellería de Educación mostra o seu compromiso coa formación continua do profesorado e coa calidade das ensinanzas musicais e artísticas no sistema educativo galego.