O Conselleiro de Cultura e Educación salienta a obra de construción educativa e cultural feita por Germán Sánchez Ruipérez, na homenaxe ao editor
Vázquez Abab participou hoxe no acto organizado polo Concello de Sanxenxo en lembranza deste fillo ilustre da vila pontevedresa
O conselleiro de Cultura, Educación e Ordenación Universitaria, Xesús Vázquez Abad, salientou hoxe “a obra de construción cultural e educativa” de Germán Sánchez Ruipérez, editor galego creador da editorial Anaya e cofundador de Edicións Xerais de Galicia, a quen se lle rendeu hoxe homenaxe en Sanxenxo. Neste sentido, Vázquez Abad convidou a honrar a memoria deste libreiro “título profesional do que el mesmo sempre se gababa”, continuando a súa obra, “feita con palabras e ideas que traen horizontes, abren fiestras, dan luz e fan ben ao espírito de todas e todos”.
“Sinxelamente quero dicir que, se ben Germán Sánchez Ruipérez xa non está connosco, as súas palabras aínda vibran forte da raíz á última póla, e as súas ideas aínda nos inspiran e guían a todos os que, dun ou doutro modo, dedicamos o noso esforzo á xestión ou á administración cultural e educativa”, rematou
O Concello de Sanxenxo organizou este acto en lembranza do seu fillo ilustre, no que participaron tamén a propia alcaldesa da vila, Catalina González Bea; o presidente do Consello da Cultura Galega e membro da Real Academia Galega, Ramón Villares Paz; o escritor, editor e membro tamén da RAG, Víctor F. Freixanes; o libreiro Xaime Corral, o editor Manuel Bragado; e Ofelia Grande de Andrés, en representación da familia de Sánchez Ruipérez. Este acto constitúe unha homenaxe póstuma de Sanxenxo ao editor – falecido en febreiro de 2012-, e completa á xa realizada en 2010, cando se lle concedeu a Cebola de Ouro da vila, coa que este concello agasalla aos seus fillos máis queridos.
Modernización da didáctica e o sector editorial
Nado en Peñaranda de Bracamonte (Salamanza), Sánchez Ruipérez, estivo intensamente vencellado a Galicia ao longo da súa vida, sendo cofundador - con Xulián Maure Rivas e Camiño Noia Campos- de Edicións Xerais de Galicia en 1979, contribuíndo á modernización do sector editorial galego.
A través da editorial Anaya, Sánchez Ruipérez participou de forma activa na modernización da didáctica, coa edición de novos manuais para a escola que romperon co anterior modelo enciclopédico. Neste sentido cómpre salientar ademais o impulso que supuxo para a lingua galega a edición por parte de Anaya de O galego na escola, primeiro libro de texto para o ensino da nosa lingua, elaborado polo profesor Xesús Alonso Montero e o inspector Xosé María Marcos de Abajo.
Coa participación do conselleiro neste acto, a Xunta de Galicia contribúe á posta en valor dunha figura como a de Sánchez Ruipérez, e do seu forte compromiso coa difusión do libro e da lectura, un labor que continúa a fundación que leva o seu nome.