O conselleiro de Cultura e Educación acompaña á comunidade educativa do CPI de Padrenda-Crespos no festival de fin de curso
Xesús Vázquez Abad visitou ademais as instalacións do centro
O conselleiro de Cultura, Educación e Ordenación Universitaria, Xesús Vázquez Abad, visitou hoxe o CPI de Padrenda-Crespos onde tivo a oportunidade de coñecer de primeira man os intereses e necesidades da comunidades educativa, e de acompañalos na celebración do festival de fin de curso.
Vázquez Abad, acompañado pola directora do centro, Mª Carmen Estévez Atrio; e pola xefa territorial da Consellería na provincia de Ourense, Mercedes Gallego; percorreu as instalacións do centro, no que estudan 159 alumnas e alumnos. Durante este percorrido puido visitar a aula dixital de infantil-primaria coa que se dotou ao colexio no marco do acordo subscrito entre a Consellería e a entidade Red.es. Así mesmo, Vázquez Abad visitou a biblioteca escolar, que leva recibido 10.900 euros do departamento educativo da Xunta de Galicia para a mellora dos seus fondos e a realización de actividades de fomento da lectura, ao abeiro do Plan LÍA 2010/2015 de bibliotecas escolares para a Lectura, a Información, e a Aprendizaxe.
O conselleiro salientou ademais o compromiso que o departamento que dirixe mantén coa comunidade educativa deste centro, no que se ten realizado un investimento de máis de 54.000 euros en obras de cubrición do patio e de melloras na calefacción no que vai de lexislatura. Ademais, estase a facilitar a conciliación da vida laboral e familiar a través do comedor, do que se benefician 189 usuarios, e do transporte escolar. De feito, este curso destínanse á prestación destes servizos no CPI máis de 350.600 euros.
Festival de fin de curso
Familias, alumnado e profesorado do CPI de Padrenda-Crespos celebraron hoxe o remate do curso 2011/2012 cun festival no que o alumnado de primaria e ESO do centro realizou diversas interpretacións musicais e bailes, tanto con melodías tradicionais como coas últimas novidades do panorama musical.
Ademais, celebráronse os actos de entrega de premios da biblioteca e do torneo de fútbol; e a festa pechouse coa actuación do grupo Xermolara.