O debate de clausura do ‘Neuromagic 2012’, organizado por Cultura e Educación, foi seguido por internautas de quince países
Os neurocientíficos e magos participantes neste foro internacional, que acadou un gran éxito, destacaron o alto nivel das sesións e os avances alcanzados na investigación sobre os mecanismos de atención do cerebro
O debate foi moderado pola editora xefe de Scientific American, a publicación científica máis importante do mundo
A liña de investigación da neuromaxia aplícase ao tratamento de trastornos cognitivos como o Alzheimer, o autismo ou a hiperactividade
San Simón, a Illa do Pensamento, clausurou o encontro Neuromagic 2012: Os Enganos da Mente, organizado pola Consellería de Cultura, Educación e Ordenación Universitaria, cun debate aberto por streaming ofrecido a través da páxina web da Fundación Illa de San Simón e de destacados blogs de divulgación científica como Amazings. Internautas de quince países seguiron en directo esta sesión, na que os magos e neurocientíficos de primeira liña internacional que participaron neste encontro realizaron unha posta en común sobre os avances alcanzados durante as sesións de traballo, nas que afondaron na liña de investigación denominada Neuromagia.
O debate estivo moderado por Mariette Di Christina-Gerosa, editora xefe de Scientific American, que está considerada como a publicación científica máis importante do mundo, o cal acredita a transcendencia deste encontro, que culminou cunha exhibición a cargo dos magos Apollo Robbins, alcumado "O ladrón cabaleiro"; James Randi "O Asombroso Randi", así como Kiko Pastur e Miguel Ángel Gea, dous dos máis detacados ilusionistas do panorama español.
Os coordinadores do encontro, Susana Martínez-Conde e Stephen Macnick, destacaron que o encontro Neuromagic 2012 supuxo un importante avance na liña de investigación que desenvolven dende o Laboratorio de Neurociencia Visual e o Laboratorio de Neurofisioloxía do Comportamento, no Barrow Institute (Phoenix, EUA) coa que revolucionaron a neurociencia cognitiva e causaron gran repercusión entre os profanos, ao achegar ao gran público ao campo a neurociencia espertando a súa curiosidade a través da maxia. Dous mundos aparentemente moi distintos pero que en realidade van da man, como "secretamente" saben os magos dende hai séculos. Os participantes neste encontro, que destacaron a alta participación e interese do pública nesta segunda edición do Neuromagic, abandonarán a Illa de San Simón ao longo do día de hoxe.
Conferencia espectáculo
No marco deste encontro, o Auditorio dá Xunqueira de Redondela tamén acolleu durante estes días unha conferencia espectáculo de carácter público e gratuíto no que participaron Susana Martínez-Conde, así como os James Randi e Apollo Robbins. Este acto estivo marcado por unha montaxe espectacular, así como contou coa activa colaboración do público.
No marco do proxecto de investigación que desenvolven Martínez-Conde e Macknik colaboraron algúns dos máis prestixiosos magos e ilusionistas do mundo como David Copperfield, Raymond Teller, Mac King, ademais de James Randi ou Apollo Robbins, xunto con neurocientíficos de repercusión mundial. O obxectivo principal foi avanzar na investigación sobre o funcionamento do cerebro e os seus mecanismos de atención, a través dos trucos dos magos ao manipular a consciencia xerando ilusións visuais e cognitivas.
As aplicacións destes estudos abrangueu dende a neurorehabilitación clínica, en casos de trastorno por déficit de atención con hiperactividade, de trauma cerebral, de autismo ou alzheimer, así como nos procesos de aprendizaxe a nivel escolar, establecendo mecanismos para aproveitar ao máximo os recursos atencionais do alumno. A incidencia das investigacións sobre neuromaxia no estudo e tratamento destes trastornos ou os avances no terreo educativo foron analizados de xeito exhaustivo polos neurocientíficos, combinándose con relatorios e exhibicións comentadas polos magos, que explicaron todas as súas técnicas para manipular a atención.