Alumnado do instituto de Teis, en Vigo, representará a Galicia na final estatal do programa Cansat da Axencia Espacial Europea
O Centro Integrado de FP Compostela acolle a entrega de premios dos proxectos dos 17 equipos participantes na fase galega
O equipo Gemini Polux, formado por alumnado do Instituto IES de Teis (Vigo), proclamouse hoxe gañador da fase galega do programa CanSat 2025 da Axencia Espacial Europea e representará á nosa Comunidade na final estatal, que se celebrará por primeira vez en Galicia, os días 13 e 14 de maio, no aeródromo de Verín-Oímbra (Ourense). O seu proxecto, inspirado na misión JUICE lanzada en 2023, ten como obxectivo medir o campo magnético e a radiación UV, replicando a exploración das lúas Europa, Ganímedes e Calisto.
O acto de presentación celebrouse no Centro Integrado de FP Compostela, onde os 17 equipos participantes deron a coñecer os seus logo da xornada de lanzamento celebrada o mércores en Cerceda. O secretario xeral técnico da Consellería de Educación, Ciencia, Universidades e Formación Profesional, Manuel Vila, destacou a relevancia desta iniciativa para achegar o alumnado á ciencia e á tecnoloxía a través dun formato práctico, estimulante e colaborativo. Aproveitou tamén para felicitar a todos os participantes pola súa implicación e creatividade.
Premiados noutras categorías
Xunto ao premio principal, recoñeceuse o labor doutros equipos nas seguintes categorías: o equipo OB, do Instituto IES Eduardo Pondal de Ponteceso, obtivo o galardón á mellor difusión e financiamento; TecnoLeiras, do Instituto IES Leiras Pulpeiro de Lugo, foi recoñecido cos mención aos mellores logros técnicos; XelmiSpace, do Instituto IES Xelmírez I, obtivo a mención de honra polo mellor logros técnicos, e o premio ao proxecto de maior relevancia científica foi para Compasat.25, do CPR Plurilingüe Compañía de María da Coruña.
O programa CanSat desafía ao alumnado a construír un satélite do tamaño dunha lata de refresco, incorporando sistemas reais de alimentación, sensores e comunicación. Estes dispositivos son lanzados desde altura mediante un dron, un globo ou outro método, e deben recoller datos durante o descenso, garantindo unha aterraxe segura. Trátase dunha proposta educativa que combina rigor técnico e creatividade, favorecendo a aprendizaxe baseada en proxectos e o desenvolvemento de competencias STEM.