O Centro Integrado de FP Vilamarín recoñece as mellores iniciativas nas ensinanzas de Hostalaría na primeira edición dos Premios ‘Toxiño D’Ouro’

A directora xeral de FP, Eugenia Pérez, e o delegado territorial da Xunta en Ourense, Manuel Pardo, participaron hoxe na entrega da primeira edición dos Premios Toxiño D’Ouro, cos que o Centro Integrado de FP Vilamarín recoñece ao alumnado, profesorado e persoal non docente de Hostalaría e turismo

Os representantes da Xunta salientaron a importancia destas ensinanzas para o sector. “Os centros que imparten os ciclos desta familia profesional son canteira dos mellores establecementos hostaleiros de Galicia e funcionan, ademais, como motor de innovación e crecemento”, destacaron. Así mesmo, felicitaron o CIFP de Vilamarín por esta iniciativa e por ser un centro referente na FP e na profesionalización da hostalaría na nosa comunidade.

Ambos puxeron en valor este evento como unha gran oportunidade ”para que os estudantes adquiran competencias reais que serán fundamentais para o seu futuro laboral”. Non en balde o certame, organizado polo ciclo superior de Aloxamentos Turísticos do CIFP de Vilamarín, pretende converterse nunha ferramenta de avaliación práctica para o alumnado, ofrecéndolles a oportunidade de planificar e xestionar un evento real, en colaboración co Centro Galego da Innovación da FP Eduardo Barreiros e con outros centros educativos, que se encargaron da maquillaxe, música, gravación e servizo de comida do evento.

Os Premios Toxiño D’Ouro recoñecen os mellores proxectos, traxectorias e iniciativas no ámbito da gastronomía, a sala e a xestión hoteleira, consolidándose como un referente na formación profesional galega.

Os galardóns e premiados son os recollidos na seguinte táboa:

Ademais da entrega de galardóns, a xornada incluíu demostracións culinarias, relatorios de expertos e diversas actividades que fomentaron o intercambio de coñecementos e experiencias entre os asistentes.