Román Rodríguez amosa o compromiso da Xunta coas ensinanzas deportivas como unha opción académica e profesional de calidade
O conselleiro en funcións de Educación visita o alumnado do ciclo de fútbol e balonmán do Instituto Sánchez Cantón que completa a súa formación no Centro Galego de Tecnificación Deportiva en Pontevedra
O conselleiro en funcións de Cultura, Educación, FP e Universidades, Román Rodríguez, amosa o compromiso da Xunta co impulso das ensinanzas deportivas en Galicia “como unha opción académica e de saída profesional de calidade”.
Así o manifestou esta mañá no Centro Galego de Tecnificación Deportiva de Pontevedra durante unha visita ao alumnado que cursa o ciclo de Ensinanzas técnicas deportivas de fútbol e balonmán, que realizan os seus estudos no Instituto IES Sánchez Cantón e nas instalacións deste centro de alto rendemento.
Precisamente o Sánchez Cantón é un dos institutos de referencia no eido deportivo coa oferta da titulación oficial de grao medio e de grao superior de Técnico Deportivo en Fútbol e Balonmán, que actualmente estudan 101 alumnos.