Cultura e Educación destinará 184.000 euros para a finalización das obras do centro de nterpretación das fortalezas do Baixo Miño na Guarda

O Consello da Xunta autorizou o asinamento dun convenio de colaboración entre a Consellería de Cultura, Educación e Ordenación Universitaria e o concello da Guarda para a finalización das obras de construción do centro de interpretación das fortalezas do Baixo Miño, no Castelo de Santa Cruz da Guarda. Deste xeito, a Xunta de Galicia investirá 184.000 euros para rematar o centro de interpretación iniciado en 2009 e que permitirá poñer en valor e coñecer amplamente a historia destas construcións defensivas.

O Castelo de Santa Cruz, declarado Ben de Interese Cultural, constitúe un fito clave dentro do sistema defensivo que configuran as fortalezas do Baixo Miño. Esta actuación  irá destinada á construción dun centro de interpretación que contará cun espazo expositivo, unha área de recepción, unha cafetaría e uns aseos, e contribuirá a dinamizar turisticamente o concello da Guarda.A través desta nova institución os visitantes poderán coñecer de forma didáctica a historia e o valor patrimonial das fortalezas defensivas do Baixo Miño.

Fortaleza de gran valor histórico

O Castelo de Santa Cruz da Guarda foi construído no século XVII en relación coa Guerra con Portugal e dentro da campaña do seu último terzo. Edificouse no prazo dun ano co material proveniente das murallas da vila da Guarda, en plena campaña militar e como consecuencia dos avances das tropas portuguesas ao outro lado do río Miño. A campaña militar dura apenas cinco anos desde a súa construción. Mantivo unha pequena gornición cada vez menor ata ser vendido a finais do século XIX e pasou a ser unha dependencia de titularidade privada acondicionada para o uso industrial, agrícola e residencial.

O castelo ten unha planta de cuadrilátero irregular alongado. Conserva un recinto amurallado, con zonas parcialmente derrubadas e outras reconstruídas con cinco garitas circulares con troneiras. As portas de acceso son de arcos semicirculares paralelos formando un paso cuberto con bóveda de canón. O castelo está incluído no Sistema Fronteirizo Atlántico da Guarda-Ínsua-Caminha na desembocadura do río Miño.