O conselleiro de Educación participa na clausura da xornada “Achégate á Quimica”, no Centro Singular de Investigación en Química Biolóxica e Materiais Moleculares de Santiago

O conselleiro de Educación e Ordenación Universitaria, Xesús Vázquez Abad, participou hoxe na clausura das xornadas “Achégate á Química”, que organiza o Centro Singular de Investigación en Química Biolóxica e Materiais Moleculares (CIQUS) de Santiago de Compostela.

Durante a súa intervención o conselleiro sinalou que “a química está na nosa vida, na de todos. E e necesaria para a existencia da materia e das relacións humanas, necesaria para o progreso da humanidade. De aí a importancia desta iniciativa do CIQUS, en colaboración coa Facultade de Química para achegar tanto aos estudantes como ao público en xeral unha visión actual e atractiva da química e da importancia desta ciencia no desenvolvemento científico e tecnolóxico global".

Sobre as xornadas sinalou que se tratou dunha ocasión única para “ver desvelado parte do misterio máxico da química a través de experimentos e demostracións, entrando nun laboratorio de investigación e observando o funcionamento de sofisticados instrumentos científicos para coñecer algunhas das liñas de investigación do centro”.

Aproveitando a presenza no Campus Vida, Vázquez Abad recordou que “quero deixar patente o magnífico nivel de distintos centros da USC no ámbito da investigación química, o que se fai patente no CIQUS, o primeiro dos Centros Singulares de Investigación do Campus de Excelencia Internacional CAMPUS VIDA, que entrou en funcionamento hai agora case un ano”.

O acto

No acto estiveron presentes o vicerreitor de investigación da Universidade de Santiago de Compostela, Francisco González García, o decano da Facultade de Química, Ramón Estevez Cabanas; a directora do CIQUS, Dolores Pérez Meirás, e o reitor da USC, Juan Casares Long, responsable de pechar o acto.

Posteriormente todos eles realizaron o mesmo percorrido que durante estes días realizaron decenas de estudantes galegos acompañados polos seus profesores e que lles permitiron un achegamento á química. Durante o acto de clausura e a visita posterior estiveron presentes as alumnas e alumnos do IES A Pontepedriña, así como os seus mestres.

Encontro en torno á química

O evento, organizado con motivo da celebración do ano internacional da Química 2011, contou coa presenza de preto de seiscentos estudantes de quince centros educativos de Santiago e concellos limítrofes, divididos en grupos de trinta alumnas e alumnos. Todos eles participaron no encontro que se vén celebrando desde o mércores 23 e que tivo como obxectivo achegar aos máis novos unha visión actual e atractiva da investigación en Química.

Ademais este encontro pretendeu transmitir á sociedade unha visión da actividade que se desenvolve na Universidade de Santiago no ámbito da química. Así como a contribución desta ciencia no contexto do desenvolvemento do Campus de Excelencia Internacional, Campus Vida, así como de transmitir a importancia desta ciencia no desenvolvemento científico e tecnolóxico global.

As actividades

Todos os grupos de estudantes percorreron o CIQUS en visitas nas que se lles presentou o Centro e o Campus Vida a través dun pequeno relatorio e apoiados por uns vídeos nos que se reflicte o impacto da química. Posteriormente o alumnado, equipado con gafas e batas, visitaron os laboratorios de química do CIQUS nos que se lles falou das investigacións que se levan a cabo no centro, a instrumentación científica precisa para elo, e visitaron a mostra “A maxia da química” exposta na entrada do centro na que se poñen en coñecemento experimentos curiosos e espectaculares.

Coa súa presenza nestas xornadas o conselleiro de Educación volveu a dar conta do apoio que se lle presta a iniciativas que permiten achegar ao alumnado galego todas aquelas actividades que se desenvolven nos máis diversos ámbitos, neste caso o da investigación e en concreto na química.