Aberto o prazo para presentarse aos premios extraordinarios de ensinanzas artísticas profesionais

A Consellería de Educación, Universidade e Formación Profesional establece un total de seis galardóns, a razón de dous para a modalidade de Música, outros dous na modalidade de Artes plásticas e Deseño e un na modalidade de Danza

Dom, 06/10/2019 - 09:00

A Consellería de Educación, Universidade e Formación Profesional, vén de abrir o prazo para presentarse aos premios extraordinarios nas ensinanzas artísticas profesionais nas modalidades de Música, de Danza e de Artes plásticas e Deseño. Tal como publicou o Diario Oficial de Galicia, o prazo de presentación de solicitudes para optar a estes galardóns rematará o día 4 de novembro.

O obxectivo destes premios é recoñecer e valorar publicamente os méritos académicos e artísticos excepcionais baseados no esforzo e no traballo de seis alumnas e alumnos que remataron os seus estudos no pasado curso 2018/19 cun excelente resultado académico. Para tal fin habilítanse 2 premios na modalidade de Música, outros dous na modalidade de Artes plásticas e Deseño e un na modalidade de Danza.

As persoas que resulten galardoadas obterán unha dotación económica de 850 euros e un diploma acreditativo, ademais da posibilidade de concorrer ao correspondente premio nacional.

Entre outros requisitos que se poden consultar no DOG, para optar a estes premios as persoas aspirantes deben contar cunha nota media igual  ou  superior  a  8,75  nos  dous  últimos  cursos  das  ensinanzas profesionais, nas modalidades de Música e Danza, ou no ciclo formativo de grao superior de Artes Plásticas e Deseño cursado.

Ademais, na modalidade de Música terán que realizar unha interpretación como solista e presentar unha copia dunha gravación de vídeo na cal interpretase tres pezas de diferentes estilos, dunha dificultade non inferior ao nivel de sexto curso de ensinanzas profesionais de Música. No caso dos estudantes de Danza, teñen que presentar unha copia dunha gravación  de  vídeo na que interpreten dúas obras da especialidade, dunha dificultade non inferior ao nivel de sexto curso das ensinanzas profesionais de Danza. Pola súa banda as persoas aspirantes na modalidade de Artes Plásticas e Deseño deben presentar a memoria e documentación gráfica do proxecto integrado ou proxecto final do ciclo formativo de grao superior polo cal concorren.