Alumnos galegos acadan 5 dos 15 premios nacionais de educación ao rendemento académico
A Consellería de Cultura e Educación celebra o resultado, por ser unha mostra da calidade do noso sistema educativo
Un total de cinco dos 15 Premios Nacionais de Educación ao rendemento académico do alumnado de Educación Secundaria Obrigatoria no curso 2015/16 outorgados polo Ministerio de Cultura, Educación y Deporte recaeron en mans de alumnas e alumnos galegos. Así se recolle na resolución ministerial, que se pode consultar no enlace http://www.mecd.gob.es/dms/mecd/servicios-al-ciudadano-mecd/catalogo/general/educacion/998209/eso/998209-eso-2016/Resolucion-concesion-PN-ESOBACH-2015-2016.pdf, e na que se indica tamén que cada un dos galardoados recibirá 1000 euros como premio.
As premiadas e premiados son Paloma Otero López, do IES Gonzalo Torrente Ballester (Pontevedra); Enrique Salvado Vigo, do IES Antonio Fraguas Fraguas (Santiago de Compostela), Eva Diz Ferreira, do CPR Plurilingüe Apostol Santiago; Juan Carlos Rocamonde Quintela e Alexo Castro Yáñez, ambos do CPR Manuel Peleteiro (Santiago de Compostela).
A Consellería de Cultura, Educación e Ordenación Universitaria celebra este resultado, que considera unha mostra da calidade do noso sistema educativo, e felicita aos estudantes galardoados polo seu esforzo e dedicación, que xa quedou patente cando obtiveron este premio a nivel autonómico. Non en balde, é requisito para acceder ao concurso nacional ter gañado, neste caso, o premio extraordinario ao rendemento académico en ESO para ese mesmo curso, que outorga esta Consellería.