Cultura e Educación promove o uso seguro da rede e as vocacións científico tecnolóxicas entre medio milleiro de alumnos de ESO na xornada ‘Cidadanía e coñecemento dixital’

O conselleiro de Cultura, Educación e Ordenación Universitaria, Román Rodríguez, acompañou esta mañá aos máis de 500 estudantes de ESO que participaron na xornada ‘Cidadanía e coñecemento dixital’, un encontro co que o departamento educativo da Xunta de Galicia busca promover o uso seguro da rede e as vocacións científico-tecnolóxicas. O encontro celebrouse na Cidade da Cultura de Galicia, estruturado en charlas e obradoiros cos que facer máis doado e lúdico o achegamento a estas materias das rapazas e rapaces dos IES Valadares (Vigo), Teis (Vigo), Vilalonga (Sanxenxo), Laxeiro (Lalín), Blanco Amor (Ourense), A Basella (Vilanova de Arousa), As Mariñas (Betanzos), Agra das Raíces (Cee), e os CPI Atios (Valdoviño) e Castroverde (Castroverde), centros participantes nestes encontros.

Román Rodríguez salientou a importancia de fomentar e concienciar nun uso seguro da internet e as novas tecnoloxías, especialmente nas redes sociais. Neste sentido, lembrou, a Consellería xa traballa nos centros educativos da man do Colexio Profesional de Enxeñería Informática de Galicia (CPEIG) co programa ‘Navega con Rumbo’, nunha liña similar á das charlas que hoxe se desenvolveron no Gaiás

Unha opción demandada

Por outra banda, o conselleiro incidiu na necesidade de impulsar as coñecidas como ‘vocacións STEM’ (Ciencia, Tecnoloxía, Enxeñerías e Matemáticas). Neste sentido lembrou que o “Estudo sobre os factores influentes na elección de estudos científicos, tecnolóxicos, enxeñerías e matemáticas en Galicia” indica que o índice de titulados nas Universidades galegas en estudos relacionados co ámbito científico tecnolóxico non será suficiente nos próximos cinco anos para cubrir a demanda de profesionais do sector TIC, xa que só un 8,5% dos alumnos matriculados no sistema universitario galego cursa carreiras do ámbito científico tecnolóxico.

Tendo en conta a necesidade de incrementar o número de titulados nestes eidos, boa parte da xornada de hoxe centrouse en obradoiros prácticos nos que a rapazada puido adquirir coñecementos básicos de programación, da man do CPEIG, ou coñecer algúns dos traballos que os rapaces do IES David Buján (Cambre) desenvolven na clase de ‘Ciencia Cidadá’, como o dun alumno que realizou con materiais reciclados unha réplica do robot R2D2, da película ‘A Guerra das Galaxias’.

Así mesmo, os alumnos do último curso da enxeñería en Telecomunicacións da Uvigo exerceron de mentores, expoñendo as súas experiencias na facultade, baixo a dirección dos seus profesores universitarios.

O obxectivo, tal e como explicou o conselleiro, é espertar a curiosidade dos rapaces arredor dunhas tecnoloxías que están plenamente presentes na súa vida diaria pero que na maior parte dos casos non se plantexa como unha opción futura de estudo ou laboral. Máis tendo en conta que a demanda nestes espazos do mercado laboral é alta e, previsiblemente, seguirá medrando nos próximos anos.

Con este fin tamén se están a desenvolver múltiples iniciativas desde o sistema educativo, tales como a impartición dunha materia de libre configuración autonómica de ‘Programación’, o programa ‘Programación nas Escolas’, tamén en colaboración co CPEIG, ou varias iniciativas dentro do Plan Proxecta. Así mesmo, o sistema de FP está a dar tamén resposta á necesidade de profesionais nestas disciplinas, coa implantación de titulacións como a de Animacións 3D, xogos e contornos interactivos.