Educación concede a matrícula de balde a 192 estudantes de segundo e posteriores cursos do Sistema Universitario Galego

Un total de 192 estudantes que actualmente cursan 2º ou posteriores cursos no Sistema Universitario Galego (SUG) teñen este ano a matrícula de balde grazas á convocatoria de axudas establecida pola Consellería de Cultura, Educación e Ordenación Universitaria.

O departamento educativo da Xunta vén de resolver a convocatoria das axudas deste ano, que pode consultarse no portal web da Consellería: http://www.edu.xunta.gal/portal/node/19061 .

Cómpre salientar que a Consellería -que tiña disposto un orzamento global inicial de 200.000 euros a esta liña- atendeu á totalidade das solicitudes que cumprían cos requisitos esixidos na convocatoria. Isto é, un total de 192 estudantes universitarios, dos cales case o 72 por cento son mulleres e o 28 por cento restantes homes.

Estas bolsas impulsadas pola Consellería veñen a cubrir o oco do alumnado de segundo e posteriores cursos pertencente á rama de coñecemento de Ensinanzas Técnicas (enxeñaría ou arquitectura), que ten superado un número de créditos igual ou superior ao 60% e menos do 65% e o pertencente ás ramas de Artes e Humanidades ou de Ciencias Sociais e Xurídicas, que ten superado un número de créditos igual ou superior ao 80% e menos do 90%, que quedou fora das bolsas de carácter xeral do Ministerio de Educación, Cultura e Deporte ao cambiaren os requisitos académicos no curso 12-13. Deste xeito o departamento educativo da Xunta reforza o seu apoio aos universitarios galegos e garante a igualdade de oportunidades no acceso aos estudos superiores.

A dotación máxima asinada a cada beneficiario oscila entre un máximo de 862,90 euros para as titulacións encadradas dentro da rama de Enxeñaría e arquitectura e grao en Belas Artes, e un máximo de 618,10 euros para as titulacións encadradas dentro da rama de Artes e Humanidades e Ciencias Sociais e Xurídicas.