FalaRedes, de Cultura e Educación, segue dinamizando o galego nos concellos da man de tres exitosas propostas de lecer

O programa de fomento do galego FalaRedes, promovido pola Consellería de Cultura, Educación e Ordenación Universitaria por medio da Secretaría Xeral de Política Lingüística, levará esta semana tres exitosas propostas de lecer no noso idioma a seis concellos da Rede de Dinamización Lingüística (RDL) da Xunta de Galicia.

Así, a xente miúda da localidade coruñesa de Dodro poderá participar mañá, ás 18:00 h na Paxareira, no divertido concurso Os Bolechas e o Sabichón, que o sábado aterrará na vila ourensá de Castro Caldelas, ás 18:00 h no Castelo, e o domingo no Barco de Valdeorras, tamén na provincia de Ourense, ás 19:00 h no Teatro Municipal Lauro Olmo.

Quen tamén se reencontrará esta fin de semana coa cativada será a obra de teatro infantil As fabas máxicas, que o sábado inicia a segunda quenda da súa xira tras ampliarse o calendario con seis pases máis grazas á colaboración económica da Deputación da Coruña, en virtude da súa participación na RDL.

O primeiro terá lugar este sábado no municipio coruñés de Outes, ás 19:00 h no Auditorio Municipal, tras o que o domingo visitará Santiago de Compostela, ás 12:30 h na Sala Mozart do Auditorio de Galicia. As persoas interesadas en asistir á función da capital galega poden retirar as entradas ata o sábado no despacho de billetes do Teatro Principal no seu horario habitual - entre as 18:00 e as 21:00 horas-.

Xa destinado a todas as idades, o concerto de fados Os sons do vento que pasa deleitará o sábado a veciñanza do concello pontevedrés de Vilaboa, onde Gonçalo Guerreiro e Dani Pais actuarán ás 19:00 h na Casa da Cultura de Riomaior.

As tres actividades, que coincidirán de xira durante todo o mes de setembro, cumpren co obxectivo do FalaRedes 2014 de fomentar o galego de xeito lúdico entre o público en xeral, enchendo o seu tempo de lecer con propostas de calidade no noso idioma.

FalaRedes 2014

Ata finais de ano, FalaRedes chegará durante as fins de semana e os festivos á totalidade de concellos da RDL a través de cinco actividades con 150 sesións gratuítas, xa que a entrada sempre é de balde ata completar a capacidade das salas.

Completan a programación desta terceira edición do programa o concerto Toc Toc e a xincana Augalingua, que xa concluíron con grande éxito as súas respectivas xiras.

A RDL é unha iniciativa impulsada polo Goberno galego para unha mellor planificación e coordinación do fomento da nosa lingua no eido da Administración local, e que na actualidade conta con preto de 160 entidades adscritas.

Máis información sobre FalaRedes 2014 no web institucional da Secretaría Xeral de Política Lingüística www.xunta.es/linguagalega/falaredes_2014 e nas redes sociais.