Vázquez Abad confirma as próximas obras de mellora das instalacións do CEIP Mestre Rodríguez Xixirei

O conselleiro de Cultura, Educación e Ordenación Universitaria, Xesús Vázquez Abad, asistiu hoxe no CEIP Mestre Rodríguez Xixirei ao festival infantil celebrado con motivo do Día Escolar da non violencia e da Paz. Durante a súa visita, o conselleiro confirmou que proximamente construiranse dous baños de infantil, adecuarase o aseo de profesores e levaranse a cabo diferentes actuacións no patio cuberto.

Deste xeito, a Administración galega volve a dar conta da súa resposta as necesidades dos centros educativos, e a pesares da difícil situación económica, continúa a realizar as actuacións precisas para garantir a total normalidade nas xornadas educativas.

Cómpre recordar que a Consellería de Cultura e Educación realizou recentemente obras relativas ao saneamento xeral exterior e acometida da auga, cun orzamento de máis de 15.000 euros. Ademais, nos últimos anos investíronse preto de 75.000 euros na reforma da instalación da calefacción e en diferentes recursos educativos, entre os que están as axudas á biblioteca e o Abalar. Cómpre recordar que este colexio, no que estudan máis de 100 alumnas e alumnos, dispón por segundo ano de contrato programa na modalidade de acompañamento fóra do horario lectivo.

Día da Paz

O conselleiro, acompañado polo director xeral de Centros e Recurso Humanos, José Manuel Pinal, o xefe territorial de Educación na provincia, Indalecio Cabana e polo director do centro, Pedro Meijide Méndez, percorreu as instalacións do centro que con motivo da celebración do Día Escolar da non violencia e da Paz celebrou un festival infantil no que participaron estudantes das distintas etapas educativas.

Cómpre recordar que con este día conmemorase o aniversario da morte de Mahatma Gandhi. O obxectivo desta celebración e transmitir valores de tolerancia, solidariedade, concordia, respecto aos Dereitos Humanos, a non violencia e a paz.