O conselleiro de Cultura e Educación anuncia a creación dun viveiro de empresa no CIFP Someso
Será o número 17 dos que conforman a rede de viveiros en centros educativos, unha aposta polo emprego xuvenil apoiando as iniciativas emprendedoras dos titulados en FP, ensinanzas artísticas e deportivas e bacharelato
Este espazo ponse, totalmente de balde, a disposición destas persoas durante dous anos para desenvolver o seu proxecto de empresa co apoio e asesoramento do profesorado e doutros emprendedores
O conselleiro de Cultura, Educación e Ordenación Universitaria, Xesús Vázquez Abad, anunciou esta mañá na súa visita ao CIFP Someso que o seu departamento ten previsto crear un viveiro de empresa neste centro coruñés. Será o número 17 dos que conforman a rede de viveiros en centros educativos, tras a decisión tomada de incrementar a súa presenza ao longo deste curso noutros centros educativos: CIFP A Farixa (Ourense), A Carballeira (Ourense), A Xunqueira (Pontevedra), Ferrolterra (Ferrol) e no CIFP As Mercedes (Lugo), así como nos IES de Fene e Ricardo Mella de Vigo. Ademais forman xa parte da rede o CIFP Ánxel Casal (A Coruña), CIFP Politécnico de Santiago, CIFP Rodolfo Ucha Piñeiro (Ferrol), CIFP Politécnico de Lugo, CIFP Porta da Auga (Ribadeo), CIFP Portovello (Ourense), CIFP A Granxa (Ponteareas), CIFP Manuel Antonio (Vigo), e IES Luís Seoane (Pontevedra).
Na cidade da Coruña funciona xa un viveiro de empresa, no CIFP Ánxel Casal, no que neste momento se está a asesorar a posta en marcha de 3 proxectos de empresa, relacionados coa dietética, a consultoría medioambiental e a animación sociocultural.
O viveiro supón unha aposta polo emprego xuvenil apoiando as iniciativas emprendedoras dos titulados en FP, ensinanzas artísticas e deportivas e bacharelato. Así, ponse a disposición destas persoas – totalmente de balde- durante dous anos un espazo no que desenvolver o seu proxecto de empresa, así como o apoio e asesoramento do profesorado e doutros emprendedores que xa puxeron en marcha as súas ideas con anterioridade. O viveiro pode ser utilizado tanto polo alumnado do propio centro como por titulados en outros centros educativos que remataran os seus estudos en ensinanzas postobrigatorias nos últimos 4 anos.
A rede de viveiros de empresa forma parte do Plan de Emprendemento no Sistema Educativo de Galicia, 'eduemprende', o marco de fomento do espírito emprendedor e para a promoción da creación de empresas e a mellora da empregabilidade entre o alumnado dos niveis educativos non universitarios do sistema educativo de Galicia, desenvolvido en colaboración polas consellerías de Cultura e Educación e de Economía e Industria.