A Consellería de Cultura e Educación publica a lista provisional de admitidos da primeira convocatoria de axudas de máster para desempregados
A listaxe provisional, inclúe aos 63 admitidos e recorda que queda aberto o período de alegacións para outros 81 que teñen que subsanar ou completar a documentación
A convocatoria, que conta cun orzamento de 200.000 euros, destinase a cubrir os gastos de matrículas a titulados universitarios en paro que desexaran cursar estudos de máster oficiais
A Consellería de Cultura, Educación e Ordenación Universitaria vén de publicar a listaxe provisional da convocatoria de axudas complementarias para desempregados, que cun orzamento de 200.000 euros foi solicitada por 144 persoas.
En total 63 destes licenciados universitarios en paro foron xa admitidos para poder recibir as axudas, consistentes no pago das matrículas de distintos estudos de máster con orientación profesional. Todos eles cumprían con todos os requisitos sinalados; entre os que se atopaba que tiveran rematados os estudos universitarios antes do 1 de xaneiro de 2010, ser residentes en Galicia os tres anos anteriores á convocatoria, e que se atopen desempregados. Os que reúnen estes requisitos poderán custear a matrícula íntegra dalgúns máster incluídos na convocatoria. Os beneficiarios deberán seguir as clases durante o curso académico e como mínimo superar un terzo dos créditos nos que formalicen a matrícula.
O resto de solicitantes que aparecen como non admitidos nesta resolución provisional teñen agora aberto o período de alegacións para completar ou subsanar a documentación en función do que se lles solicita.
Axudas ao estudo
Esta convocatoria da Consellería de Cultura e Educación, que se fixo por primeira vez este curso, e unha das accións desenvolvidas a prol dos estudos como as axudas complementarias para o pagamento da matrícula do alumnado de novo ingreso e de continuidade, posibilitando o apoio económico naqueles casos que non poden acceder ás axudas polo incremento de esixencias académicas da convocatoria do Ministerio de Educación, Cultura y Deporte, malia que cumpran os requisitos económicos establecidos.
Ademais a Consellería convocará un ano máis as axudas complementarias para os estudantes de universidades galegas que estean a realizar o programa Erasmus, e nas que se manterá, como mínimo, o incremento fixado o ano pasado do 30% no que se elevou o orzamento total a 1.300.000 euros. Unha partida incluída no total que a Consellería destina a axudas para os estudantes universitarios e que supera os tres millóns de euros.