A Consellería de Educación nomea a Juan José Casares Long novo reitor da Universidade de Santiago de Compostela
O profesor doutor foi escollido pola comunidade universitaria nas eleccións do pasado 26 de maio
O Consello da Xunta aprobou hoxe o nomeamento do profesor doutor Juan José Casares Long como reitor magnífico da Universidade de Santiago de Compostela. Este nomeamento prodúcese despois de que Casares Long fose elixido nas eleccións á Reitoría da USC o pasado 26 de maio.
Juan José Casares Long é catedrático, licenciado en Química pola Universidade de Santiago de Compostela, doutor en Química pola Universidade Autónoma de Barcelona e doutor en Enxeñaría Química pola Universidade de Salford. Tras desenvolver o seu labor docente no Colexio Universitario de Vigo, na Universidade do Petróleo e Minerais (Arabia Saudí) e na Universidade de Santiago de Compostela, foi técnico superior da Empresa Nacional de Electricidade, director do Centro de Supercomputación de Galicia, e director do Centro de Información e Tecnoloxía Ambiental da Xunta de Galicia. Ademais, foi director do Departamento de Enxeñaría Química da Universidade de Santiago de Compostela entre 2004 e 2008.