A alumna Andrea Suleimán Casalderrey, de 4º ESO, obtivo o segundo lugar na IV edición dos premios Isabel Zendal de Promoción do pensamento crítico en Educación Secundaria e Bacharelato. Andrea concursaba na categoría B, para o alumnado de 4ºESO, 1º e 2º de Bacharelato e dos ciclos formativos de grao medio.

O seu traballo, presentado baixo o lema "Sofía" titúlase "As fraudes da saúde e a desinformación na actualidade". O traballo, que se pode ler picando na ligazón, analiza as fraudes para a saúde que xurdiron nos últimos tempos, como a homeopatía e demais pseudociencias. A través da análise de tres casos particulares (os parches para adelgazar "Slimemerstar", o spray "Hondrox" e as cápsulas "Reduslim"), aproveita para reflexionar sobre o tipo de publicidade e de obxectivos que perseguen este tipo de produtos.

Para a realización do traballo, Andrea contou co asesoramento do seu profesor de Cultura Científica, Sergio Núñez.

Moitos parabéns, Andrea!

Axudas dirixidas a alumnado que presenta unha necesidade específica de recibir apoio educativo derivado dalgunha das siguientes situacións:

- Discapacidade.

- Trastorno grave da conducta o da comunicación ou a linguaxe.

- Trastorno do espectro autista.

- Altas capacidades

Poderase pedir desde o 19 de maio ata o 30 de setembro de 2022. 

Todo o proceso de solicitude da bolsa realízase a través da sede electrónica do Ministerio de Educación e Formación Profesional. Unha vez cuberto, terás que imprimir o formulario de solicitude (un PDF) e presentalo no centro educativo no que vas estudar, se non tes certificado electrónico.

Máis información:  (enlace web Axudas Apoio Educativo) / (enlace como solicitala).

A asociación histórico-cultural Recreadores de Galicia participa desde hai moitos anos en certames de recreación histórica por toda España e o estranxeiro. Nos últimos anos colabora cos centros educativos de Galicia na tarefa de aproximar a realidade do mundo romano ao alumnado de Primaria e Secundaria. 

O 26 de abril compartiron connosco a primeira metade da mañá, mostrando ao alumnado de Cultura Clásica de 3º e 4º da ESO a vestimenta típica do mundo romano ou as armas e as técnicas de combate das lexións.

Adáptanse as programacións dos departamentos no relativo á avaliación, os criterios de promoción, de titulación e de concesión de matrículas de honra segundo a ORDE do 25 de xaneiro de 2022 que actualiza a normativa de avaliación. 

Máis información: (enlace).

A exposición Boix, fotógrafo de Mauthausen, permanecerá no centro até o venres 11 de marzo.

A exposición, foi concibida pola Asociación para a Recuperación da Memoria Histórica, que nola cede de maneira gratuíta. Utiliza imaxes tiradas polo fotógrafo catalán Francesc Boix durante a súa reclusión no campo de exterminio nazi de Mauthausen. A partir desas imaxes relátase a experiencia das persoas recluídas no campo, en particular das galegas e galegos que nel foron internadas.

A exposición será obxecto de diversas actividades organizadas polo Departamento de Xeografía e Historia, destinadas particularmente ao alumnado de 4º ESO. A exposición complétase co documental Boix, fotógrafo do inferno. Ademais, o venres 11 de marzo a presidenta da ARMH, o investigador José Manuel López Tuñas ofrecerá unha conferencia ao alumnado. Nesa conferencia estará acompañado de José Luis Alamán.

José Luis é neto de Martín Ferreiro Álvarez, concelleiro do Concello da Coruña na II República. Fuxido do fascismo, Martín foi apreixado en Francia e encarcerado en Mauthausen a finais de 1940. Ao ano seguinte sería asasinado no campo de exterminio de Gusen.

A exposición pode ser visitada por persoas alleas ao centro en horario de mañá. Para acceder é necesario rexistrarse na conserxaría.

O 11 de febreiro publicouse no DOG a nova orde de avaliación do alumnado de Primaria, Secundaria e Bacharelato.

Pode accederse á devandita orde picando na imaxe. Entre outras novidades a orde recolle os novos requisitos para a promoción de curso na Secundaria e a titulación en 4º ESO. Case todas as novidades con respecto á Secundaria contéñense nos artigos 7-12 da orde.

Outra das novidades da orde é que os departamentos deben elaborar unha adaptación das súas programacións didácticas para o período que vai do 6 ao 22 de xuño. Ese período é de obrigada asistencia para todo o alumnado.

Os departamentos irán publicando esas adaptacións nas vindeiras semanas. O prazo para realizalas expira o 12 de abril.

Con motivo da celebración do Día Internacional da Muller e da Nena na Ciencia, o venres 11 de febreiro acudiu ao centro a Doutora Socorro Castro García, investigadora e profesora da Universidade da Coruña. O obxectivo desta visita era o de visibilizar as mulleres que se adican a estudos e carreiras profesionais de Ciencias. Ao tempo queríase espertar a vocación científica entre o alumnado.

A nosa convidada estudou Química na Universidade de Santiago de Compostela. Dende entón participou en múltiples proxectos de investigación e presentou o resultado dos seus traballos en moitos congresos internacionais e revistas científicas. Realizou estancias en varios centros de investigación internacionais como as universidades de París e Berkeley, o European Sincrotron Radation Facility (ESRF) e o Institute Laue-Langevin (ILL), ambos en Grenoble (Francia). Así mesmo, fai labores de divulgación científica e imparte charlas e obradoiros para todo tipo de público.

Durante a charla contounos que fai unha científica, como se fixo investigadora, que é o que máis lle gusta investigar (materiais para facer baterías, nanopartículas para o transporte de medicamentos, gafas que escurecen dándolle a un botón…) e tamén cales son as súas afeccións (a montaña, os viaxes e a fotografía).

Grazas a Socorro (ou Suqui, que é como lle gusta que a chamen) aprendemos que as mulleres científicas son mulleres próximas a nós que se superan para crecer profesionalmente e mellorar o mundo que nos rodea. Con dedicación e esforzo todos e todas podemos ser científicos/as!!!!

Xa está a chegar o Entroido!

A Equipa de Dinamización da Lingua Galega xunto do Departamento de Xeografía e Historia organizan un concurso de recollida de receitas típicas de Entroido. Podedes consultar as bases no cartel que acompaña esta entrada.

Filloas, orellas, freixós, chulas, roscos de anís e sen anís, cocidos con e sen cachucha forman parte das comidas típicas destas datas.

Ide recollendo as mellores larpeiradas que se fagan na vosa casa! Así faremos un delicioso libro de receitas.

Os departamentos didácticos do IES Ramón Otero Pedrayo da Coruña organizan numerosas actividades extraescolares e complementarias ao longo do curso. Estas actividades están recollidas nas programacións de aula e son un complemento á formación do alumnado. Destas actividades moitas realízanse no propio centro, durante o horario lectivo do alumnado. Outras, que deberán ser autorizadas debidamente polas persoas responsables do alumnado, desenvólvense fóra do centro e poden exceder do horario lectivo.

Na marxe dereita desta páxina web, no apartado Eventos, pode consultar todas as actividades pola súa data de celebración. Para iso, deberá picar na data concreta do calendario. No caso de que haxa unha actividade programada, o día aparecerá marcado en cor negra. Ao picar no día atopará tamén unha breve descrición da actividade, o seu horario e os cursos aos que está dirixida.

As actividades extraescolares e complementarias, suspendidas durante o curso 2020/21 a causa da pandemia de coronavirus, retómanse neste curso 2021/22. Estas actividades estarán sempre suxeitas ás restricións sanitarias vixentes e respectan as indicacións recollidas no protocolo Covid da Consellaría de Educación.

Nas táboas amósase o calendario de exames de materias pendentes de cursos anteriores para o curso 2023/24.

O alumnado que teña materias pendentes deberá presentarse no Salón de Actos do centro no horario indicado, conforme as indicacións dos plans de reforzo e recuperación previstos por cada departamento didáctico.

Téñase en conta que non todos os departamentos avalían mediante exame, polo que pode non ser necesario acudir en todas as datas marcadas.

1ª Avaliación, novembro de 2023

2ª Avaliación, febreiro de 2024

 3ª Avaliación, maio de 2024