Actividades no centro

O alumnado de Afondamento de Galego participou no acto de presentación do calendario-receitario 2024 da empresa viguesa de Conxelados Pereira. No acto participaron dous chefs, Ana Vilar, nominada como mellor cociñeira no certame de Tapas de Galicia, e Lluis de la Riva, finalista da 11ª edición do concurso de Master-cheg España. Cada un elaborou un prato das receitas do libro Cocina Gallega de Álvaro Cunqueiro e Araceli Filgueira. Cociñaron para nós en directo e degustamos unha empanada de chocos e vieiras con xamón.

Puidemos coñecer o fillo do escritor, César Cunqueiro, que nos contou algunhas anécdotas do seu pai e tamén aos responsables da empresa Pereira.

No acto participaron tamén as alumnas Gadea López e Alba García en nome do alumnado e o noso director.

Foi unha xornada moi especial porque se estreou o coro do instituto que dirixe David Barros cantando o fermoso poema de Cunqueiro "No niño novo do vento".

O pasado 30 de novembro o alumnado de Afondamento de Galego puido achegarse máis ao labor que realiza a clase política no Parlamento Galego. Esta é unha das actividades que organiza o Parlamento de Galicia para achegar a política os máis novos e, para iso, achegáronse ao centro tes exdeputadas que contaron a súa experiencia na cámara dende posicións políticas diferentes.
María Ángeles García Míguez, Consuelo Martínez García e Carme Adán Villamarín conversaron co alumnado e instárono a que se preocupen polos temas de actualidade que nos inflúen, ao tempo que lles trasladaron que hai moitas formas de facer política e que o Parlamento é un órgano aberto ao que poden trasladar propostas.
Unha experiencia moi gratificante para un alumnado que en pouco tempo terá idade para votar e decidir.

O Equipo Morgana durante toda a semana animou ao alumnado a que participase no muro contra as violencias machistas. Así fomos escribindo aquelas frases que escoitamos repetidamente sobre as mulleres e que son limitantes, que crean inseguridades, que nos cousifican... A cada persoa que deixaba a súa lousa regaláronlle unha chapa que as integrantes do Equipo Morgana fixeron co material dos Polos Creativos.

O 25 de novembro vestímonos de negro como mostra externa da nosa repulsa por todas as violencias e gardamos un minuto de silencio polas que faltan.

Un ano máis o Departamento de Bioloxía convoca o concurso FOTO E CIENCIA, destinado ao alumnado da ESO e Bacharelato. Estableceranse tres categorías e cada participante poderá presentar só unha imaxe que deberá ser orixinal.

O prazo de presentación das fotografías rematará o 1 de decembro.

Para coñecer polo miúdo as bases clica aquí.

Esta semana visitou o noso centro o lingüísta da Ludwig-Maximilians Universität de Munic, Francisco Calvo del Olmo. O alumnado de bacharelato desfrutou dun encontro co autor que é autor de dúas novelas en galego: Crónica córnica e Unha saca de patacas, ambas editadas na Editorial Xerais.

Conversou co alumnado sobre a súa aprendizaxe de galego en Madrid, na Universidad Complutense, e o seu amor polos idiomas que o levou a ser un gran coñecedor das linguas románicas e non só. A vontade de entendernos, a autodeterminación da nosa identidade sempre en contrución, o proceso creativo ou a trama das súas novelas moi apegada á sociolingüística, foron algúns dos temas que debullou co noso alumnado.

Agradecemos a súa visita e o interese que espertaron as súas palabras.