Proxectos de vida activa e deportiva - PDC

Neste curso, 2022-23, o noso centro acadou os 50 anos de vida. Por este motivo, púxose en marcha a organización do evento, co que celebrar dito aniversario.

Pouco a pouco, foron xurdindo ideas e foise falando con diversas institucións e/ou asociacións da contorna, ao tempo que se traballaba no colexio, para ter listo o material preciso e preparadas as instalacións.

Por suposto, queríaselle dar a oportunidade, a cantos/as pasaran polo colexio nalgún intre da súa vida: exalumnos/as, exmestres/as, extraballadores/as non docentes, de coñecer de primeira man os cambios que foron transformando diferentes zonas do centro nos derradeiros anos e aquelas outras (as menos) que permanecen case como no seu inicio.

Porén, pensábase que o básico sería contribuír a revivir diversas actividades e/ou vivencias, levadas a cabo nas instalacións do centro ou fóra del, realizando excursións, por exemplo. Deste xeito, elaborouse un vídeo con fotografías de distintas épocas e fíxose unha exposición con outras, ao tempo que se prepararon varias estacións de xogos populares: trompo, corda, estornela, aro con manillar/guía, carreiras de sacos, o pano, bólos, a ra, os zancos, o arratramortos ... Ademais, para amenizar a xornada contouse coa participación do grupo de música tradicional: "Cherumia", do Liceo de Noia outro de pandeireteiras e de baile tradicional: "Pandeireteiras do Tremuzo" do Freixo (Outes) e, xa para rematar a xornada, a banda: "Uxía Lambona e a Banda Molona" deu un concerto, co que gozaron, fundamentalmente, os/as cativos/as. 

Malia a todo e dado que o curso xa está concluíndo, quíxose aproveitar para darlle a coñecer á Comunidade educativa e ao resto de asistentes ao acto o proxecto realizado ao longo do curso: "Outes soñando o patio", por todo o alumnado e profesorado do centro, premiado en Polos Creativos na etapa de Primaria.

Queremos darlle as grazas aos/ás asistentes e colaboradores/as na celebración (especialmente a aqueles/as que fixeron km para achegarse ao centro) por acompañarnos nesta importante data, á vez que agardamos ter acertado na escolla de: obradoiros, exposicións, estacións de xogos populares, etc, para que todos/as desfrutásemos dunha marabillosa tarde.

Para rematar, aclarar que, aínda que nos gustaría subir fotos dos/as asistentes ao evento, só o faremos dalgunha imaxe representativa da xornada. Pois, ao estaren presentes menores non pertencentes ao centro, non dispoñemos dos permisos pertinentes. Se che apetece botarlle unha ollada, preme aquí. 

A por outros cincuenta!!!

O 14 de xuño o alumnado de EI e profesorado do centro saíron en autobuses cara a Broña, onde os/as agardaban algúns familiares e logo dos saúdos, bicos e apertas pertinentes realizaron unha andaina dende Broña á Punta do Requeixo (ida e volta) e máis tarde brincaron e conversaron na area.

Grazas ás familias participantes na actividade e agardamos fose do voso agrado!.

Se queres ver algunhas imaxes desta actividade preme aquí.

O 26 de maio o alumnado de 4º de EP, as súas titoras e a profesora de EF visitaron as instalacións do Club de piragüismo de Outes, para levar a cabo a actividade de bautismo en kaiak e autobaleirables no Tambre á altura de Ponte Nafonso.

Unha vez realizadas as presentacións oportunas e cambiarnos, María e Gabriel, os monitores da entidade foron dándonos as explicacións pertinentes e repartindo os elementos de axuda a flotación (chalecos salvavidas) e axudándonos a colocalos. Logo, baixamos as embarcacións ao Tambre e, debido ao vento que ese día facía, leváronnos coas embarcacións de apoio deica pasar da marabillosa ponte, que lle dá nome á zona, Ponte Nafonso, para despois levar a cabo a actividade propiamente dita. 

Dicir que a inmensa maioría gozou coa actividade e que manifestaron as gañas de repetila, cousa que nos alegra moito.

Se queres ver algunha imaxe desta actividade, preme aquí. 

O 19 de maio o alumnado de 6º EP, a súa profesora de EF e o seu profesor de Inglés levaron a cabo unha xornada de convivencia, a través dunha andaina e a realización de varios xogos populares, principalmente.

Por suposto, tamén se conversou ao longo da xornada e se comentaron experiencias, vivencias, emocións, etc.

Quedou patente, cos comentarios da maioría, que a paisaxe, cruzar a ponte-colgante, ver os edificios alí construídos, foron un acerto para realizar as actividades da xornada.

Neste caso, dicir que non nos acompañou ningún representante de ningunha das familias,  a pesares de convidalas, como se fixo no resto de grupos.

Se tes gañas de botarlle unha ollada ás imaxes dese día e revivilo, preme aquí.

O 16 de maio, coa idea de conmemorar o Día das Letras Galegas, levouse a cabo unha xornada de convivencia a través de: xogos populares (corda, arrastramortos, mariola, tres en raia, carreiras de sacos, trompos, estornela, aros con manillar ou guía, trécolas, bólos, etc), muiñeira e música da nosa Terra co alumnado e profesorado do IES Poeta Añón, nas instalacións do noso centro.

Agardamos que todos/as desfrutasen das actividades e que, especialmente, ao alumnado do Poeta Añón (a inmensa maioría exalumnado do noso centro) lle fixese ilusión regresar ao centro no que tantas horas pasaron, viviron diversas experiencias, brincaron, etc.

Se tes gañas de revivir ese día con algunhas imaxes, preme aquí.