Curso 23_24

A semana pasada, foi unha semana moi especial no López Ferreiro. Tras unha travesía por aire de Brest a Porto e outra por terra ata Santiago, chegaron os nosos visitantes que se nos colaron directos no corazón. A mágoa? Que se fixo moi curto.

Compartimos actividades diversas polas mañás e achegámolos a Santiago e arredores polas tardes. Foron conscientes do moito que nos une a nivel cultural, xeográfico e climático :)

Perdemos a conta do número de veces que expresaron o seu agradecemento, polo ben acollidos-as que se sentiron por parte de persoal docente/non docente e alumnado do centro, o enfeitizados-as que estaban coa nosa cidade e as nosas paisaxes

e... coa comida de Susana e Pepe. Desfrutaron moito da observación e participación en actividades de programas implantados no noso centro.

Pola nosa parte, desde o equipo de Seccións Bilingües, estamos enormemente agradecidas polas achegas do noso querido grupo bretón, polas actividades que prepararon para os distintos cursos do colexio, por integrarse e participar de tan bo grao en todo aquelo que tiñamos preparado.

Estamos moi agradecidas tamén da estupenda acollida por parte da nosa comunidade educativa e do esforzo investido en ofrecerlles o mellor do noso colexio.

E, como unha imaxe vale máis que mil palabras, preparamos unha selección delas para tentar trasladar un pouco do que aquí sucedeu.

Alumnado de 6º de EP participou hoxe no Gran Xogo sobre o Día das Letras Galegas na Biblioteca Pública Ánxel Casal.

Neste xogo, ademais de divertido, as pequenas e pequenos participantes aprenderon, e puxeron en práctica os seus coñecementos,  algúns datos importantes sobre a autora homenaxeada no Día das Letras Galegas 2024, Luísa Villalta, e sobre outras curiosidades relacionadas con esta data.

O alumnado de 5º e 6º de Primaria do noso centro foi recibido polas persoas responsables do Servizo de Normalización Lingüística da Universidade de Santiago de Compostela.

Máis de 50 nenos e nenas do CEIP López Ferreiro, desprazáronse ata o SNL, no Campus Sur.

Quixeron presentarlles a última fase da campaña fai un trato co galego! Aquí atendemos en galego. Tamén lles achegaron o adhesivo co que premiamos a quen se compromete co noso idioma.

Manuel N. Singala, Xusto Rodríguez e Manuel Bermúdez interesáronse polo traballo que levamos a cabo no centro, pola opinión que a nosa campaña lles merecía e a súa utilidade. Animaron a esta rapazada a seguir desenvolvéndose en galego. 

Agasalláronnos cunhas bolsas dunha iniciativa deste Servizo: Témoslle LEI.

Queremos presentarvos o Catálogo de Xogos que elaboramos este curso, no marco do Proxecto de innovación educativa en dinamización lingüística (Proxecta+) que estamos a desenvolver.  É unha guía dixital de enredos, un traballo no que participaron todos os ciclos do centro e que amosan que nesta escola se xoga en galego. Esta proposta realizouse grazas á colaboración do Equipo de Plan Dixital e recorreuse, maioritariamente, ao Libro da Memoria, elaborado polas aulas Maruxa e Coralia.

Animádevos a botar man deles, estes xogos forman parte da cultura que nos é propia! Premede na imaxe para acceder.

No mes no que se celebra o Día do libro, a biblioteca Helena Villar quixo renderlle  unha homenaxe con variadas formas de lectura (e de escritura).

Así, o 3 de abril compartimos con Marisa Irimia contos que viñan do Vietnam, do Chad e de Noruega. Presentounos mediante  a técnica do kamishibai, e foi todo un éxito do que gozaron as familias e a cativada para celebrar o Día Internacional do Libro Infantil e Xuvenil.

En horario lectivo, o alumnado de 5º explorou con Charo Pita as Xeografías máxicas da Península Ibérica, coas que pronto se compoñerá un podcast no que se dará a coñecer as figuras míticas ligadas a determinados lugares ou accidentes xeográficos e as súas historias.

Tamén o alumnado de educación infantil participou da biblioteca creativa, mediante o obradoiro Borranchobot: descubrindo  a electricidade  a través da arte, co que aprenderon o funcionamento dos circuítos eléctricos elaborando unha creación artística en equipo ao tempo que exploraron as posibilidades dos circuítos.

E os Encontros lectores continuaron as súas xuntanzas, nas que, ademais, recibimos a visita de Alba Míguez e Damián Gómez, autores de Os vagalumes de Marí, un dos títulos seleccionados. As nenas e os nenos, así como as súas familias, intercambiaron impresións e mesmo levaron tatuaxes creados por Alba e Damián.

E o día 30, entregáronse os premios do concurso de poesía “Versos que flotan” e do “Concurso de portadas coas familias”. Emoción e nervios polo recoñecemento a un traballo que xoga coa beleza das palabras e coas emocións que as historias lidas nos transmiten.

En resumo, na época da alfabetización múltiple, diferentes formas de ler na biblioteca Helena Villar do CEIP López Ferreiro.

Todas estas actividades desenvolvéronse grazas á dotación económica do PLAMBE, así como aos programas de Lectura e familias, Club de lectura, Radio na biblio e Biblioteca creativa, nos que o centro tamén participa.

O pasado 21 de marzo levamos a cabo unha actividade de concienciación sobre a importancia da auga para o planeta.

É unha actividade que se realiza en moitos colexios de distintos países, a longo do mapa. Participamos na actividade por invitación do colexio co que temos o intercambio en Lingua Inglesa, Petite École de Paris, de Brest, que nos visitará en breve.

Deixamos imaxes dos traballos realizados polo noso alumnado de 6º e imaxes dos traballos realizados por distintos cursos do colexio bretón.

O enlace á páxina onde podedes informarvos máis sobre o tema é https://www.lagrandelessive.net/avec-ou-sans-eau/

Para o desenvolvemento do Proxecto de innovación educativa en dinamización lingüística, que estamos a levar a cabo, o Equipo de Dinamización da Lingua Galega creou unha conta de Instagram:@edlglopezferreiro. Nesta conta estanse a subir os apoios das familias do alumnado do Equipo 21 e doutras persoas significativas que colaboran, desde os seus inicios, hai dous cursos, coa nosa campaña Fai un trato co galego!

Animámosvos a sumarvos a esta iniciativa remitíndonos os vosos vídeos ao correo electrónico do EDLG: edlglopezferreiro@gmail.com. No Concello, onde onte presentamos a nosa campaña, xa nos están a apoiar!

O López Ferreiro conmemorou o 8M, coa actuación do dúo galego de música folk tradicional galega Caamaño & Ameixeiras. Coa acordeonista Sabela e coa violista e vocalista Antía, celebramos o Día Internacional das Mulleres, unha xornada para reivindicar a igualdade e facer balance sobre a situación das mulleres na nosa sociedade.

Este concerto, organizado polo EDLG do noso centro, desenvolveuse grazas á iniciativa dos Contratos-programa Inclúe (CPInclúe), nos que estamos a participar, concretamente do IGUÁLA-T.

O EDLG do CEIP López Ferreiro, quere convidarvos a acceder ao seu novo blog, Fai un trato co galego!

A través del poderedes seguir o proxecto de innovación educativa en dinamización lingüística, que estamos a desenvolver no centro.

Esta é unha proposta que está a realizar, sobre todo, o alumnado de 5º e 6º de Primaria. A través dela quérese convidar a todos e a todas a xogar, a relacionarse e a atender en galego!