Román Rodríguez subliña que a inclusión educativa é unha “prioridade” da Xunta e unha “oportunidade” para acadar unha sociedade máis respectuosa e democrática”

O conselleiro de Cultura, Educación, FP e Universidades, Román Rodríguez, salienta o compromiso da Xunta de Galicia co reto da inclusión educativa como “unha das nosas prioridades” así como “unha oportunidade para acadar unha sociedade máis respectuosa e máis democrática”. 

Así o expuxo esta mañá con motivo da inauguración do Congreso Internacional de Inclusión Educativa organizado polo seu departamento, que congrega un milleiro de persoas entre docentes e expertos para afondar en accións específicas neste eido. Román Rodríguez deu a benvida e agradeceu a presenza neste foro de Nathalie Berger, directora de Apoio ás reformas dos Estados membros da Comisión Europea, encargada do relatorio inaugural. O congreso tamén serviu de marco para a entrega dos Premios de Inclusión Educativa, uns galardóns anuais nos que se recoñecen as boas prácticas neste eido tanto para colexios como para institutos.

Na súa intervención, o conselleiro apuntou á innovación e á inclusión como “requisitos para asegurar que a educación avanza paralela ao ritmo social” ao tempo que garante que todos os nenos e nenas “teñan os mesmos dereitos e oportunidades de aprendizaxe, independentemente da súa situación”. Para iso, matizou que resulta “imprescindible identificar as barreiras que dificultan o proceso de aprendizaxe e aplicar as medidas necesarias para minimizalas”.

Neste senso, puxo en valor a fortaleza do sistema educativo galego, cun modelo onde prima a igualdade de oportunidades, a calidade na atención emocional e o fomento do bo clima nas aulas.

Precisamente para seguir avanzando nesta senda, a Estratexia Galega de Convivencia Escolar recolle como unha das súas prioridades o fomento dun maior coñecemento do coidado emocional do alumnado e de contornas educativas saudables tanto para alumnos como para docentes. Ao respecto, Román Rodríguez fixo especial fincapé nos programas que se están a desenvolver e, especialmente na formación do profesorado, de xeito que dispoñan de todas as ferramentas necesarias para afrontar cada situación.

O titular de Educación do Goberno galego referiuse á recen aprobación do Plan integral contra o acoso escolar e o ciberacoso, cunha perspectiva multidisciplinar coa implicación de seis departamentos autonómicos así como das familias, ou a Guía de Benestar Emocional.  

Premios Boas Prácticas inclusivas

O conselleiro aproveitou para felicitar aos oito colexios e institutos que resultaron galardoados na edición deste ano dos Premios de Boas Prácticas Inclusivas, a cuxo alumnado e profesorado agradeceu o traballo e esforzo manifestado e que sirve “de inspiración para continuar avanzando no noso sistema educativo”.

Na categoría A o primeiro premio recaeu no Colexio CEIP Vicente Risco de Vigo, cuxos estudantes ofreceron un recital coa Orquestra Son das Flores. O segundo premio foi para o Colexio CEIP Camiño Inglés de Oroso, o terceiro para o Agro do Muíño de Ames e a mención de honra para o colexio de Piñeiros de Narón.  

Na categoría B, destinada a ESO, Bacharelato, FP e Formación de persoas adultas e ensinanzas de réxime especial, o primeiro premio foi para o Instituto IES Xograr Afonso Gómez de Sarria, o segundo para o Sanxillao de Lugo, o terceiro para o Instituto de Cacheiras de Teo e a mención de honra para o Instituto de Chapela, en Redondela.