Castelao, Xosé Neira Vilas e Lois Pereiro achéganse aos centros educativos a través de tres exposicións

Tres destacados autores galegos, como son Alfonso Daniel Rodríguez Castelao, Xosé Neira Vilas e Lois Pereiro, percorrerán diversos centros educativos de Galicia a través de exposicións sobre a súa vida e a súa obra. Farano desde mañá e ata final de ano, grazas a unha iniciativa promovida conxuntamente pola Secretaría Xeral de Política Lingüística e pola Dirección Xeral do Libro, Bibliotecas e Arquivos.

A primeira das exposicións en chegar aos centros será Querido Balbino (1961-2011). Cincuenta anos de Memorias dun neno labrego. O IES A Guía de Vigo acollerá desde mañá e ata o 6 de novembro esta mostra, que quere ser unha homenaxe ao libro máis lido e máis traducido da literatura galega, Memorias dun neno labrego, e ao seu autor, Xosé Neira Vilas, cando se cumpre medio século da publicación da obra.

Balbino, entre os escolares

Comisariada por Valentín García Gómez e Luís Reimóndez, a exposición articúlase en dous eixos principais. Dunha banda, os escolares poderán achegarse á traxectoria vital do escritor de Vila de Cruces a partir de fotografías, documentos e correspondencia. Doutra banda, amósase diverso material referido á traxectoria seguida polo propio libro e o seu protagonista, Balbino. A mostra complétase con 10 obras pictóricas de artistas galegos.

Antes de chegar ao seu próximo centro de destino, o CEIP Xesús Golmar de Lalín –onde estará do 5 ao 25 de decembro–, Querido Balbino realizará unha parada no Auditorio Municipal de Celanova desde o 14 de novembro ata o 4 de decembro.

Interactuando con Lois Pereiro

O escritor homenaxeado polo Día das Letras Galegas en 2011, Lois Pereiro, protagoniza unha exposición interactiva deseñada por Ouvirmos e composta de diversos apartados. En Fotografía, o alumnado poderá coñecer a vida do autor a través do seu álbum fotográfico familiar. Xogando coas palabras convida os escolares a interactuar cos poemas de Lois Pereiro, creando novas palabras e compoñendo os seus versos. Mentres, A música inclúe poemas do escritor musicados por Manu Clavijo, Alexandro González, Nación Reixa e Radio Océano. Finalmente, ademais de presentar a súa produción literaria, a exposición permitire escoitar A voz do poeta no mítico recital do café coruñés Moka en 1996.

A exposición sobre Lois Pereiro estará do 31 de outubro ao 13 de novembro no IES Alfoz-Valadouro, de Alfoz; do 14 ao 27 de novembro visitará o IES Manuel Chamoso Lamas, do Carballiño; e rematará a súa itinerancia en Carral, no CPI Vicente Otero Valcárcel, do 28 de novembro ata o 11 de decembro.

125 anos do nacemento de Castelao

O pasado día 30 de xaneiro cumpríronse 125 anos do nacemento de Castelao. Co fin de conmemorar esta data, a Xunta promoveu unha exposición que repasa a traxectoria vital e o labor do escritor de Rianxo. Para isto, a mostra, comisariada por Xosé Ramón Fandiño, inclúe sete paneis que incorporan unha parte de desenvolvemento teórico e outra de sistemas interactivos, ademais de música ambiental galega.

A vila natal do escritor será a primeira parada da mostra, onde permanecerá desde o 24 de outubro ata o 6 de novembro no CEIP que leva o seu nome. Posteriormente, a exposición viaxará ata o IES Ortigueira, de Ortigueira, do 14 ao 27 de novembro, e rematará o seu percorrido no IES Leira Pulpeiro de Lugo, do 12 ao 25 de decembro.

Visitas ás bibliotecas nodais nos últimos meses

Antes de iniciar a súa itinerancia polos centros educativos, a Secretaría Xeral de Política Lingüística e a Dirección Xeral do Libro, Bibliotecas e Arquivos levaron as exposicións por todas as bibliotecas nodais de Galicia, para contribuír á difusión da vida e da obra dos tres escritores entre a cidadanía.