O conselleiro de Educación percorreu o novo módulo de infantil do CPI de Mondariz

O conselleiro de Educación e Ordenación Universitaria, Xesús Vázquez Abad, percorreu esta mañá o renovado módulo de Infantil do CPI de Mondariz, despois de que se investisen 190.000 euros en ampliación e reforma neste espazo, así como en traballos para mellorar a seguridade do centro, que benefician aos seus 399 estudantes.

Vázquez Abad, aproveitou a súa visita ao colexio, na que estivo acompañado polo xefe territorial de Educación en Pontevedra, César Pérez Ares, para comprobar o funcionamento das 4 aulas Abalar que están a funcionar nos cursos de 5º de primaria e 1º da ESO. “A estratexia de implantación das novas tecnoloxías da información e a comunicación no sistema educativo que está a desenvolver a Xunta de Galicia no marco do Proxecto Abalar –explicou o conselleiro- permite que 84 estudantes deste colexio teñan este ano cadanseu ordenador ultraportátil na aula, co que poden tirar o máximo aproveitamento dos novos recursos didácticos dixitais que se están a desenvolver na actualidade, e que poden ademais descargar do repositorio de contidos do portal web espazoAbalar”.

O titular do departamento educativo da Xunta de Galicia visitou ademais a biblioteca do CPI, que leva recibidos 9.100 euros para a mellora dos seus fondos e recursos. “Deste xeito foméntase entre os escolares o hábito lector, fundamental para o éxito escolar”, dixo Vázquez Abad.

Con esta visita o conselleiro de Educación continúa a percorrer os centros educativos galegos, coñecendo de primeira man os intereses e necesidades particulares das súas respectivas comunidades educativas.