Galicia e México impulsan a colaboración e a mobilidade universitaria no eido académico e científico

O conselleiro de Cultura, Educación e Ordenación Universitaria, Román Rodríguez, e o secretario xeral executivo da Asociación Nacional de Universidades e Instituciones de Educación Superior de México (ANUIES), Jaime Valls Esponda, asinaron este xoves un memorando de entendemento para colaborar en actividades académicas, científicas e culturais de interese común. O acordo asinouse en Guadalajara (México) e contou coa presenza dos tres reitores das universidades galegas, Juan Viaño (Universidade de Santiago de Compostela), Salustiano Mato (Universidade de Vigo) e Julio Abalde (Universidade da Coruña). Tamén asistiu o secretario xeral de Universidades, José Alberto Díez de Castro.

Esta sinatura enmárcase no acordo rubricado o pasado mes de maio entre o presidente da Xunta e a secretaria xeral iberoamericana, Rebeca Grynspan, mediante o cal a Xunta se adheriu á alianza para a mobilidade académica. Precisamente, unha das primeiras accións a desenvolver dentro deste marco de cooperación coa Secretaría General Iberoamericana (SEGIB) era a posta en marcha de misións de atracción de coñecemento en Iberoamérica, co fin de dar a coñecer o Sistema Universitario de Galicia (SUG) e intentar captar alumnado de grao e máster para as universidades galegas.

Nese sentido, o memorando de entendemento asinado este xoves coa ANUIES dálle recorrido á colaboración coa SEGIB e, por outro lado, tamén axuda a desenvolver unha das accións  contempladas no Plan de Excelencia do SUG para o trienio 2018-2020, presentado este mesmo mes de novembro no Consello da Xunta.

Internacionalización e aproveitamento de sinerxías

En concreto, e dentro das accións máis relevantes que inclúe o memorando, cómpre resaltar a colaboración entre a ANUIES e o SUG para o recoñecemento mutuo de títulos e certificacións académicas, ou a promoción do intercambio de profesores, especialistas e estudantes.

Tamén se compartirán as boas prácticas para incrementar a calidade no sistema; fomentarase a integración entre a investigación e as actividades industrias e comerciais; desenvolveranse proxectos de investigación; promoverase a internacionalización da educación superior e o desenvolvemento profesional docente; e facilitarase o intercambio de información, publicacións, vídeos, bibliografía e material didáctico.

Así mesmo, o memorando tamén contempla posibles cooperacións para fomentar a capacitación de recursos humanos de alto nivel; a organización de misións de traballo coa participación de profesores, estudantes e profesionais que traballen en áreas de interese mutuo; ou promover o deseño, creación e distribucións de publicacións, entre outras. 

En todo caso, as accións concretas nestes ámbitos globais de actuación desenvolveranse posteriormente en convenios específicos entre ambas as partes.