Pelerinaxes pon en valor a riqueza patrimonial galega e achégalla á rapazada da man da Xeración Nós
O secretario xeral de Política Lingüística asistiu hoxe en Vilamarín a unha das charlas interactivas escolares que ofrece este proxecto educativo multidisciplinario por medio dos equipos de dinamización da lingua galega
O filme adapta a obra literaria homónima na que Otero Pedrayo narra a viaxe que realizou canda Risco e Ben-Cho-Shey de Ourense a Santo André de Teixido en 1927
O encontro contou coa participación do director, Simone Saibene
O secretario xeral de Política Lingüística, Valentín García, asistiu hoxe á mañá no ourensán IES de Vilamarín a unha das charlas interactivas arredor do filme Pelerinaxes, inspirado na obra homónima de Ramón Otero Pedrayo, que programan en centros de ensino dependentes da Consellería de Cultura e Educación os equipos de dinamización da lingua galega no marco do proxecto educativo multidisciplinario homónimo.
A iniciativa apóiase neste filme no que o director italiano Simone Saibene -que participa nas charlas- adapta a obra literaria do mesmo nome na que Ramón Otero Pedrayo narra a viaxe que realizou canda Vicente Risco e Xosé Ramón Fernández-Oxea (Ben-Cho-Shey) en 1927. O obxectivo é achegar ao alumnado de formación profesional, bacharelato e dos últimos cursos da ESO á riqueza patrimonial galega da man dos homes da Xeración Nós e do seu ideario.
Nesta primeira edición participan centros de ensino localizados nos puntos nos que os tres escritores fixeron as primeiras paradas da viaxe: o IES Otero Pedrayo (Ourense), o IES As Lagoas (Ourense), o IES Blanco Amor (Ourense), o CPI Antonio Faílde (Cambeo, Coles), o IES Vilamarín (Vilamarín), o CPI Virxe da Saleta (San Cristovo de Cea) e o IES Monterroso (Monterroso).
Máis información no Portal da Lingua Galega www.lingua.gal.