Maxia, música e banda deseñada: estes son os principais ingredientes da programación que ten preparada para esta semana Bocaberta, o programa de dinamización do uso do galego que a Secretaría Xeral de Política Lingüística dirixe aos mozos e mozas de 3 a 18 anos.

Una das propostas con máis percorrido para os próximos días é Abrapalabra, dirixida aos nenos e nenas de 4 a 11 anos. A actividade está protagonizada polo mago Carlos Coira, que porá en escena un divertido espectáculo para amosar toda a maxia que hai na lingua e para ensinarlles divertidos trucos aos máis novos. Esta proposta para o lecer dos pequenos e das pequenas da casa está hoxe en Boimorto e Sobrado, mañá visitará Vilasantar e Frades, o mércores realizará novas paradas en Cesuras e Aranga, o xoves aterrará en Paderne e, finalmente, o venres viaxará ata Xermade e Abadín.

A maxia tamén é a base de Atrapado na torre, un espectáculo para nenos e nenas dos 4 aos 8 anos que visitará o sábado as localidades de Ribadumia e Valga. A través desta proposta,  o prestidixitador Chrystian Magic amósalles aos nenos e nenas como, a través do esforzo e a ilusión, acadou o seu soño de converterse en prestidixitador profesional.

Bocaberta nun formato artístico

A banda deseñada tamén terá gran protagonismo no calendario de Bocaberta para os próximos días. Dunha banda, Anxo Fariña, autor da saga Os Megatoxos, mostraralles aos mozos de 12 anos de Miño e de Neda todos os segredos da súa profesión. Farao nas dúas sesións da súa actividade, Ti creas historia, previstas para este sábado nas dúas localidades coruñesas. Doutra banda, outro dos autores galegos máis recoñecidos, Fran Bueno, mostraralles os múltiples trucos para realizar unha historia de banda deseñada no obradoiro Galimatías; que visitará o venres o concello de Ribadavia.

Lingua e música

O terceiro ingrediente da programación de Bocaberta para estes días será a música, que cobrará protagonismo cara á fin de semana. Farao a través da actividade Ola, ola, la!, que  ofrecerá obradoiros musicais para nenos e nenas dos 4 aos 8 anos, o sábado na Coruña. Esta proposta baséase nas cancións do grupo infantil Mamá Cabra, popular entre os rapaces e rapazas galegos. Ademais, Olga Kirk e Pablo Díaz impartirán o mesmo día, en Lugo, novas sesións de Canta música!, un obradoiro destinado ao público de 5 a 7 anos. Esta actividade busca favorecer a aprendizaxe de cancións infantís e xogos relacionados con elas e mais coa fala (adiviñas, trabalinguas, rimas...).

Ata o próximo mes de maio, Bocaberta levará por toda Galicia un total de 747 actividades para promover o uso do galego entre os rapaces e rapazas de 3 a 18 anos. A información sobre o calendario do programa pode consultarse na páxina web da Secretaría Xeral de Política Lingüísitica, www.xunta.es/linguagalega/bocaberta, e nas redes sociais de Facebook, Tuenti e Twitter.