Bocaberta entra no seu quinto mes de programación cunha axenda repleta de actividades en galego para os máis novos
O programa da Secretaría Xeral de Política Lingüística visita esta semana 19 concellos con diversas iniciativas para dinamizar o uso do galego entre os rapaces e rapazas de 3 a 18 anos
Bocaberta leva estes días múltiples actividades de dinamización lingüística polas catro provincias galegas cando se cumpren cinco meses da súa programación de 2010-2011. Esta iniciativa da Secretaría Xeral de Política Lingüística, que busca fomentar o uso do galego entre os rapaces e rapazas de 3 a 18 anos, visita esta semana os municipios de Carballedo, Pantón, Arteixo, Fisterra, Val do Dubra, A Pobra do Brollón, O Pino, Sober, Negreira, Ribas de Sil, Castro Caldelas, Vimianzo, Viana do Bolo, A Pobra de Trives, Dodro, A Coruña, Ourense, Santiago de Compostela e Santa Comba cunha programación chea de maxia, música, cómic e radio en galego.
Unha das actividades que volve esta semana á programación de Bocaberta é Detrás da canción. Protagonizada polos integrantes dos grupos de pop Projecto Mourente e The Homens, propón aprender nunha tarde como se poden facer cancións co material informático que temos na casa e gozar finalmente dun concerto acústico. Detrás da canción, que vai dirixida a adolescentes dos 12 aos 18 anos, estará o venres na Coruña, o sábado en Vimianzo e o domingo en Santa Comba.
Para os máis pequenos tamén haberá divertidas propostas musicais. É o caso de Ola, ola, la!, o prestixioso musical que pon en escena o grupo Mamá Cabra. As cancións infantís teste conxunto poderán escoitarse no Auditorio Municipal de Ourense o venres e no Teatro Principal de Santiago de Compostela o sábado e o domingo.
A maxia da lingua
A maxia de Abrapalabra, un espectáculo co mago Carlos Coira dirixido aos nenos e nenas de 3 a 11 anos, percorre diversas localidades esta semana. Onte visitou Carballedo e Pantón o luns. Hoxe foi a quenda da Pobra do Brollón e de Sober o martes e mañá realizará novas paradas en Ribas de Sil e Castro Caldelas. Contos de maxia, outra proposta relacionada cos trucos e co ilusionismo para os rapaces e rapazas de 9 a 14 anos, visitou Fisterra o luns, hoxe estivo en Negreira e mañá parará en Vimianzo.
A banda deseñada terá un importante oco na programación de Bocaberta para esta semana. Ti creas a historia, a actividade impartida polo debuxante Anxo Fariña, levou hoxe os seus obradoiros para rapaces e rapazas de 12 anos a Val do Dubra e ao Pino e o xoves visitará Viana do Bolo e A Pobra de Trives. Mentres, os obradoiros de cómic Galimatías para rapaces e rapazas de 13 a 18 anos, que imparte o debuxante Fran Bueno, chegará a Dodro o venres.
Toda a información sobre Bocaberta
Explorando varias disciplinas como o deseño gráfico, a escrita creativa e a radio está a actividade Palabras no ar. Esta iniciativa da Secretaría Xeral de Política Lingüística poderana aproveitar os mozos e mozas de Arteixo o xoves e o venres.
Os horarios e localizacións de todas estas actividades poden consultarse no boletín do programa, accesible desde http://www.xunta.es/linguagalega/bocaberta, así como nas principais redes sociais de internet nas que está presente Bocaberta: Facebook, Twitter e Tuenti.
Desde o pasado mes de outubro e ata maio, Bocaberta percorrerá todos os concellos de Galicia con 747 actividades para promover o uso do galego entre os rapaces e rapazas de 3 a 18 anos.