O conselleiro de Educación e Ordenación Universitaria, Xesús Vázquez Abad, inaugurou hoxe un viveiro de empresas no CIFP Politécnico de Santiago de Compostela, unha iniciativa enmarcada no Plan de emprendemento no sistema educativo ‘eduemprende’.

Coa creación deste viveiro Educación, en colaboración coa Consellería de Economía e Industria a través do Centro Europeo de Empresas e Innovación de Galicia (BIC Galicia), dá un paso máis no fomento do espírito emprendedor no ensino non universitario. Ao mesmo tempo foméntase a cultura emprendedora entre todos os axentes implicados no ámbito educativo, desde os docentes ata as empresas.

Durante a súa visita ao centro, no que estudan 756 alumnas e alumnos de ciclos formativos e programas de cualificación profesional inicial, o conselleiro aproveitou para comprobar o estado do muro do recinto tras as obras de reposición ás que a Consellería destinou no 2010 máis de 473.000 euros.

No acto estiveron presentes ademais a directora de BIC Galicia, Maite Cancelo; o director xeral de Educación, FP e Innovación Educativa, Jose Luis Mira; o director do CIFP Politécnico, José M. Leis Blanco; numerosas autoridades e representantes de empresas.

Centro de referencia

Xesús Vázquez Abad destacou a importancia do novo viveiro, “que converte ao CIFP Politécnico de Santiago nun centro de referencia para educadores e empresarios, e fundamentalmente para o alumnado de formación profesional de toda a comarca”. O conselleiro explicou que “estes espazos brindan ao alumnado, tanto ao que estea a cursar ensinanzas de FP como aos titulados que as remataron nos últimos catros anos, a posibilidade de desenvolver negocios viables que permitan a súa incorporación ao mercado laboral, a innovación e a creación de emprego”.

Neste sentido o titular do departamento educativo da Xunta de Galicia recalcou “o compromiso firme da Consellería coa implantación da cultura emprendedora no sistema educativo,apoiando as iniciativas que contribúan a visualizar unha formación que garanta a competitividade do noso tecido produtivo e que responda ás súas necesidades”.

Rede en crecemento

O viveiro do CIFP Politécnico intégrase na Rede de viveiros de empresas nos centros de formación profesional de Galicia, completando a existencia destes servizos nas sete grandes cidades galegas. De feito Galicia é pioneira na implantación destes espazos en centros educativos, e está previsto que neste ano 2011 se amplíe esta rede a máis centros integrados de FP.

Os espazos físicos onde se atopan os viveiros sitúanse dentro das instalacións dos centros educativos e están dotados co mobiliario e equipamentos necesarios para o inicio do funcionamento dunha actividade emprendedora. Ademais as alumnas e alumnos contan co apoio e asesoramento de profesores e técnicos especialistas na actividade, e co a axuda do responsable do viveiro que acompañará ao emprendedor en todo momento, sempre de xeito gratuíto.

Coa implantación dos viveiros dáse resposta ás esixencias derivadas da globalización de incidir en plans e medidas que fomente un dinamismo empresarial máis áxil, con empresas máis activas e innovadoras.