Román Rodríguez avanza unha inserción laboral en FP próxima ao 80%, posible grazas ao esforzo e ás destrezas do alumnado
O conselleiro de Cultura e Educación participou na entrega de medallas do Galicia Skills 2016, que se celebrou en Silleda desde o mércores e que reuniu a 100 alumnos de 40 centros educativos, preparados por 77 profesores
Agradeceu a implicación e participación dos centros e dos docentes, así como das empresas colaboradoras, o que reforza os vínculos entre FP e sector empresarial
Os gañadores de cada unha das 17 especialidades en competición representarán a Galicia no campionato nacional Spainskills, que se celebrará o vindeiro ano
O conselleiro de Cultura, Educación e Ordenación Universitaria, Román Rodríguez, avanzou hoxe en Silleda que o último estudo realizado polo seu departamento sobre inserción laboral en Formación Profesional eleva a porcentaxe de alumnado que atopou traballo ao rematar os estudos a preto dun 80%. Segundo explicou con motivo da entrega de medallas da cuarta edición Galicia Skills 2016, trátase dunha realidade posible grazas ao esforzo e ás destrezas adquiridas polos estudantes de FP, cada vez máis vinculadas ás necesidades dos sectores produtivos. O conselleiro estivo acompañado polo secretario de Estado de Educación, Formación Profesional e Universidades, Marcial Marín Hellín.
Precisamente, e co fin de demostrar os seus coñecementos, o recinto Feira Internacional de Galicia Abanca acolleu desde o mércores o maior campionato de FP a nivel galego, o Galicia Skills, que reuniu a un total de 100 alumnos de 40 centros educativos, que por primeira vez competiron nun único espazo de xeito simultáneo. Tras dous días de intensas probas, hoxe déronse a coñecer aos gañadores de cada unha das 17 especialidades, as denominadas “skills”, que se corresponden con un ou máis ciclos das distintas familias profesionais.
Colaboración de 40 empresas
Román Rodríguez destacou o compromiso e implicación dos centros, así como dos docentes, na formación dos mozos e mozas, lembrando que o alumnado participante foi preparado por 77 profesores, mentres que outros 19 expertos dedicáronse a coordinar o acto co fin de que estivese todo preparado para competir. Do mesmo xeito, un total de dez centros educativos tamén realizaron labores de soporte, tales como montaxe dos stands, cátering, servizo audiovisual etc.
Así mesmo, o conselleiro agradeceu a participación das empresas colaboradoras no campionato, unha implicación que se vén incrementando ano a ano, ata acadar as 40 compañías de hoxe en día. Neste sentido, lembrou os vínculos necesarios entre Formación Profesional e tecido económico e empresarial, co fin de avanzar tanto na internacionalización e competitividade das empresas como na cualificación e preparación dos mozos e mozas ante os retos vindeiros.
Os premiados
Os alumnos premiados –outorgouse por cada especialidade un primeiro e un segundo premio– recibiron a súa correspondente medalla, deseñada por alumnado da Escola de Arte e Superior de Deseño Mestre Mateo de Santiago, así como un agasallo xentileza das empresas colaboradoras en cada “skill” do campionato.
Cada un dos gañadores conforman o equipo de alumnos e alumnas que representará a Galicia no campionato nacional Spainskills, que se celebrará do 27 de febreiro ao 4 de marzo de 2017. Ademais, a este grupo tamén se suman os representantes da especialidade de Floraría (Soraya Barbosa Oliveira, do IES San Rosendo de Mondoñedo), así como de Instalacións eléctricas (Alexandru Coretchi Tutunaru, do IES Universidade Laboral de Culleredo), que participaron nesta competición a modo de demostración e que finalmente foron elixidos polos xurados.
ESPECIALIDADE
|
PRIMEIRO PREMIO |
SEGUNDO PREMIO |
Servizos de restaurante |
Ana Sofía Emidio Martínez, do CIFP Manuel Antonio de Vigo |
Antonio Camino Pintor, do CIFP Compostela de Santiago |
Pintura de vehículos |
Silvia Folgueira Rico, do CIFP As Mercedes de Lugo |
Ángela Calvo Filgueiras, do CIFP Ferrolterra de Ferrol |
Administración de sistemas en rede |
Milan Cornado Rodríguez, do IES San Clemente de Santiago |
Eloy Figueiras González, do IES Isidro Parga Pondal de Carballo |
Coidados auxiliares de enfermaría |
Daniel Pérez López, do IES Leixa de Ferrol
|
Yosman Josue Montáñez Castro, do CIFP Ánxel Casal-Monte Alto da Coruña |
Tecnoloxía da moda |
Graciela González Touriño, do CIFP Manuel Antonio de Vigo |
Noelia Rodríguez Barreiro, do CIFP Manuel Antonio de Vigo |
Panadaría |
Alba Triñanes Dieste, do CIFP Compostela de Santiago |
Carla Rivadulla Benedicto, do CIFP Carlos Oroza de Pontevedra |
Tecnoloxía do automóbil |
Miguel Paz Pena, do IES As Mariñas de Betanzos |
Martín García García, do IES Vilalonga de Sanxenxo |
Cociña
|
Carolina Espasandín Pérez, do CIFP Compostela de Santiago |
Víctor Paz Seoane, do CIFP Paseo das Pontes da Coruña |
Xardinaría |
Damián Ferreira Barros e
Esther Ogando Pando, do CIFP A Granxa de Ponteareas |
Cristofer Cobas Portela e
Francisco Caramés Puga, do IES Montecelo de Pontevedra |
Enxeñaría de deseño mecánico CAD |
Carlos Andrés Ramallo Lestayo, do CIFP Ferrolterra de Ferrol |
Álvaro García de León Rodríguez, do IES Johan Carballeira de Bueu |
Control industrial |
Borja Abal Varela, do IES Fermín Bouza Brey de Vilagarcía |
José Benito Bestilleiro París, do IES Urbano Lugrís da Coruña |
Refrixeración
|
Pablo Lema Paz, do IES Universidade Laboral de Culleredo |
Eduardo Villaverde Iglesias, do CIFP Valentín Paz Andrade de Vigo |
Carpintaría e ebanistaría |
Raúl Piñeiro Rodríguez, do CIFP Politécnico de Santiago |
Diego Varela García, do CIFP Politécnico de Lugo |
Peiteado
|
María Lucía López Bujeiro, do CIFP Someso da Coruña |
Nuria Maceda Corujo, do IES A Pinguela de Monforte de Lemos |
Mecanizado
|
Raúl Fernández Lorenzo, do IES Politécnico de Vigo |
Jonathan Macedo Dios, do IES Frei Martín Sarmiento, de Pontevedra |
Soldadura
|
Julián Fernández Souto, do IES de Valga
|
David Pazo Amil, do IES Marco do Camballón de Vila de Cruces |
Mecatrónica
|
Miguel Sotelo González e
Raúl Acuña Fariñas, do IES Politécnico de Vigo |
Álvaro Casas Rodríguez e
Fernando Fajín Vaamonde, do CIFP Politécnico de Santiago |