O conselleiro de Educación e Ordenación Universitaria, Xesús Vázquez Abad, fixo hoxe entrega das bolsas a estudantes da Fundación Ventura Figueroa. En total 27 universitarios beneficiáronse das axudas, cun valor total de 46.800 euros.

Durante o acto, no que foron concedidas as axudas, estiveron presentes o secretario xeral da Consellería de Educación; e o reitor da Universidade de Santiago de Compostela, Juan Casares Long. Xunto a eles tamén estiveron presentes os representantes do Padroado Ventura Figueroa.

Ao longo da súa intervención Vázquez Abad destacou a importancia da Ventura Figueroa, “a Fundación máis antiga de España, unha das máis veteranas do mundo, con 227 anos de existencia”; e amosou a súa satisfacción por que, malia ao paso do tempo “o figueroismo segue a indicarnos, nestes tempos de crise e de recesión económica, que o camiño é a confianza na nosa xuventude universitaria, nas ideas e na formación”.

Neste sentido, o conselleiro felicitou aos premiados e invitounos a continuar cos seus bos resultados. “Con todos vós, con traballo e con ilusión, conquistaremos o futuro”, rematou.

Contía das axudas

Nesta convocatoria déronse nove bolsas máis que en anteriores edicións. En total distribuíronse vinte e unha axudas de 1.300
euros cada unha, para inicio ou continuación de estudos de grao, licenciatura, arquitecto, diplomado, mestres, enxeñeiro técnico ou arquitecto técnico; ademais de tres bolsas de 2.600 euros, cada unha, para continuar os estudos universitarios de terceiro ciclo ou os estudos oficiais de máster. A última partida foron tres bolsas, de 3.900 euros cada unha, para os estudos conducentes ao título de doutor.

Os beneficiarios

No momento de conceder as bolsas tivéronse en conta a situación económica dos solicitantes, a súa traxectoria académica e o grao de parentesco co fundador. Así, e atendendo á actual situación de crise, deuse unha maior preferencia no acceso ás axudas aos solicitantes que presenten máis dificultades económicas.

A fundación

Con esta resolución consolidase o labor da Fundación Ventura Figueroa, centrado na actividade benéfica. A entidade, a máis antiga de Europa, foi fundada polos herdeiros de don Manuel Ventura Figueroa, figura destacada na historia de España durante o século XVII, época na que foi patriarca das Indias, arcebispo de Laodicea e gobernador do Consello e Cámara de Castilla.