Galicia rexistrou no cuarto trimestre de 2014 a taxa de abandono escolar máis baixa da súa historia, un 16,4%
A taxa media anual sitúase no 18,5%, fronte ao 25,8% que se rexistrara ao remate do ano 2009
A mellora respecto da media do 2013 é de 1,7 puntos
Galicia rexistrou no cuarto trimestre do ano 2014 a taxa de abandono educativo temperán da súa historia, un 16,4%. Segundo os datos facilitados polo Instituto Galego de Estatística (IGE), a media do ano 2014 foi do 18,5%, moi lonxe do 25,8% de media que se rexistrou no 2009; e 1,7 puntos por debaixo da media de 2013.
No que respecta á comparativa co 2013, a evolución demostra o paulatina mellora ao longo do ano no que se refire á diminución da taxa. Así, a taxa diminuíu en 1,2 no primeiro trimestre do 2014 respecto do mesmo período do ano 2013, mentres que a diminución no cuarto trimestre respecto do mesmo do ano anterior foi de 2,5 punto (16,5 no cuarto trimestre de 2014 fronte a 19 no de 2013).
A Consellería de Cultura, Educación e Ordenación Universitaria celebra esta diminución da taxa de abandono, que vén a confirmar o acertado das iniciativas en prol do éxito escolar, da permanencia do alumnado no sistema educativo e de introdución de programas innovadores desenvolvidas por este departamento nos últimos anos.