O secretario xeral de Universidades preside o xurado da XIV edición do concurso de proxectos empresariais innovadores da USC
Os galardóns serán para as categorías de Base Tecnolóxica, Empresa Xove e Muller Emprendedora e están retribuídos cunha contía económica que vai dende os 2.000 ata os 24.000 euros, ademais de con tres accións formativas
A Consellería de Cultura e Educación, por medio do secretario xeral de Universidades, José Alberto Díez de Castro, participou no certame que organiza a Universidade de Santiago de Compostela (USC), a través do seu programa de creación de empresas UniEmprende, co fin de premiar a emprendedores e emprendedoras que presenten proxectos de empresa innovadores.
Díez de Castro presidiu o xurado que tivo como secretario ao director do programa Uniemprende da USC; e como vogais á secretaria xeral de Igualdade, Susana López Abella; o director xeral de Traballo e Economía Social, Odilo Martiñá Rodríguez; a directora da Cátedra de Emprendemento Social da USC, Elena Vázquez Cendón; a directora do Centro de Estudos Avanzados da USC, Mª Xosé Rodríguez Galdo; e o director da Área de Competitividade do IGAPE, Norberto Penedo Rey.
A esta convocatoria pódense presentar estudantes e titulados de calquera das universidades galegas e dos centros asociados da UNED en Galicia, en calquera área de coñecemento (Humanidades, Ciencias da Saúde, Ciencias Xurídicas e Sociais, Ciencias Experimentais e Ensinanzas Técnicas) que, individualmente ou en equipo, teñan un proxecto empresarial innovador con potencialidade para converterse nunha empresa.
Os premios concederanse por proxecto, independentemente do número de participantes no mesmo, e os galardóns serán na categoría de Base Tecnolóxica, dotado de 2.000 ata 24.000 euros de financiamento mediante préstamo participativo na de empresa esa Xove, recompensado con 2.000 euros, e na de Muller Emprendedora, tamén retribuído con 2.000 euros. Ademais os proxectos gañadores teñen acceso gratuíto a tres accións formativas, que consistirán na concesión de tres prazas por cada traballo distinguido, e serán organizadas polo programa UniEmprende no prazo dun ano, unha vez que teñan constituída a súa empresa.
Por outra banda, a organización do concurso resérvase o dereito de declarar deserto un ou varios premios, se os proxectos non reúnen as condicións necesarias para ser galardoados, ou no seu caso, ampliar os premios concedendo os accésits que considere oportunos. Así mesmo cada estudio só poderá recibir unha recoñecemento.