A Xunta de Galicia, a través da Secretaría Xeral de Política Lingüística, impulsará un completo programa de actividades de formación e difusión da lingua galega a través do Espazo das Linguas Ibéricas do Instituto Cervantes. Farao no próximo curso 2010-2011, a través dun convenio multilateral no que tamén participarán a Generalitat de Catalunya, o Instituto Camões, a Universidade de Alcalá de Henares e mais o Instituto Vasco Etxepare.

O secretario xeral de Política Lingüística, Anxo Lorenzo, reuniuse hoxe na sede do Instituto Cervantes en Madrid con representantes de todas as entidades que asinarán o convenio para impulsar o Espazo das Linguas Ibéricas. Trátase dun proxecto multilateral que arrincou no ano 2009 e que se sustenta en dous piares fundamentais. Por unha banda, un programa de actividades culturais conxunto, como ciclos de conferencias, proxeccións audiovisuais, exposicións, etc., e por outra, un plan de formación de cada unha das linguas ibéricas.

Durante o encontro, ademais de tratar as liñas que definirán este marco de cooperación permanente, fíxose balance das actividades académicas do curso 2009-2010, ao tempo que se realizaron propostas para a nova programación académica do curso 2010-2011.

A proxección exterior da lingua galega a través do Instituto Cervantes

Na actualidade, a Secretaría Xeral de Política Lingüística da Consellería de Educación e Ordenación Universitaria e o Instituto Cervantes manteñen un marco de cooperación institucional para a realización de actividades de promoción e difusión da lingua galega que se desenvolven a través da rede de centros do instituto.

Entre estas actividades que se inclúen na programación académica do Cervantes destaca a oferta de cursos de formación de lingua galega preparatorios para a obtención do certificado de lingua galega (Celga), así como a realización das probas Celga