Educación dotará a máis de 130 aulas de Vigo e a súa área de influencia de 2.858 ultraportátiles para desenvolver o Proxecto ABALAR a partir do próximo curso

Un total de 2.858  alumnas e alumnos de 57 centros de Vigo e da área do sur da provincia de Pontevedra terán en setembro cadanseu ordenador ultraportátil na aula, grazas á implantación do Proxecto ABALAR nos centros educativos desa zona, que vai desenvolver a Consellería de Educación e Ordenación Universitaria. A iniciativa supón un investimento de 2.250.000 euros en equipamento informático, servizo de soporte técnico e didáctico aos centros educativos, así como infraestruturas e formación do profesorado, o que demostra a forte aposta que a administración galega está a facer pola calidade do ensino.

Así o manifestou hoxe o director xeral de Educación, Formación Profesional e Innovación Educativa, José Luis Mira Lema, que presentou o Plan ABALAR aos 57 directores e directoras  dos centros seleccionados en Vigo e a súa área de influencia para desenvolver este proxecto a partir do curso 2010-2011. Así, nesta zona quedarán resultan beneficiados nesta primeira fase 35 centros públicos, o que se traduce en 86 aulas e 1.756 estudantes.

Todos eles forman parte da primeira fase que entrará no proxecto para a implantación das novas Tecnoloxías da Información e a Comunicación (TIC), que beneficiarán no vindeiro ano académico a 132 aulas de colexios e institutos con alumnos e alumnas de 5º de Primaria e 1º da ESO nesta zona. Ademais, o proxecto dotará ás aulas de encerado dixital e ordenador para o profesorado.