Coñeces o punto lila da nosa biblioteca? O 25 de novembro, con motivo do Día Internacional contra a Violencia machista, sacamos parte dos seus libros ao recibidor do instituto. Mais, onde podes atopar a diario estes libros? Xunto á porta da entrada da biblio, atoparás un andel, pintado de violeta, cunha manchea de libros sobre feminismo, igualdade, como detectar a discriminación que sufrimos as mulleres polo feito de nacer mulleres, como empoderarnos, a sexualidade dende o punto de vista feminino e feminista, as diversidades sexuais e a loita LGTBIQ+... En fin, a porta cara a un universo ollado dende unha óptica diferente: a mirada da igualdade. Non son libros só para mulleres, non. Son libros para todas aquelas persoas que cren na igualdade como ideal no que afianzar as nosas sociedades.

Aplaudidos foron os tres alumnos gañadores na entrega de premios do concurso de podcast de terror, que tivo lugar nos eventos de celebración do Samaín. Calquera dos trece podcast que se presentaron ao concurso merecería ser galardoado, mais había que escoller. Encargadas de resolver ese dilema estivemos as docentes que formamos parte do equipo de biblioteca. 

Tiñamos que decidir e decidimos:

-primeiro premio para Manuel Sar Sánchez, que nos sorprendeu cunha historia na que non falta nin Vakner nin a Santa Compaña;

-segundo premio para Brais Caamaño Canosa , toda unha road movie de terror,

-terceiro premio para Mauro Rey Toba, cun relato sinistro que ten como escenario o río.

-Tamén, pola sensibilidade coa que se conta a historia, se lle entregou unha mención ao alumno Santiago Leira García.

Para consultar os audios, pincha en arquivos adxuntos, na parte de abaixo da nova.