blogue debiblioteca

Os días 19 e 20 de maio tivo lugar no Pazo da Cultura o III Congreso Galego de Seguridade  e Educación Viaria;  este encontro foi organizado polo Concello de Narón  e a Rede de Cidades que Camiñan e patrocinado pola  Diputación da Coruña e  a Axencia Galega de Seguridade Pública (Agasp), coa colaboración de outras entidades.

A alcaldesa de Narón, Marián Ferreiro Díaz, acompañada do edil de Seguridade Cidadá, Román Romero, inagurou o xoves 19 esta nova edición que este ano  tiña como lema da convocatoria “As persoas primeiro”.

Ao longo de estes dous días  a coordinadora técnica da Rede de Cidades que Camiñan,  Ana Montalbán, foi a encargada de presentar  e dar paso ás diferentes mesas que se foron sucedendo ao longo das xornadas, ás que acudiron preto dun centenar de persoas.

A mañá do venres, día 19 de maio, estivo dedicada á cooperación internacional  e na sesión participaron  dous relatores chegados do exterior, a colombiana Laura Daniela Gómez e o turco Emrah Kocak, nunha mesa moderada por María Pérez Rico.

Na segunda parte desta sesión tomaron  parte Iago Grueiro, alumno do IES Catabois e Javier Oliveira, do IES As Telleiras, en representación das comunidades escolares que participaron no encontro:  As Telleiras, Catabois, Piñeiros, Ponte de Xuvia , A Gándara e Santiago Apóstol.

O representante do noso centro, Javier Oliveira, de 1º ESO, alumno da materia de Mobilidade Segura e Sostible, que é impartida pola profesora de Tecnoloxía Aurora Romar Gasalla, explicou aos asistentes as actividades realizadas este curso 2021-2022.

O  día 18 de maio, un día despois da celebración das Letras Galegas, deixounos Domingo Villar,  a quen todos os que o coñeceron definían no só como un escritor de calidade formidable, senón tamén  como un home bo no mellor sentido da palabra, un grande amigo dos seus amigos e un namorado de Galicia.

A súa perda deixa orfo ao comisario Caldas, o seu inesquecible personaxe,  e a toda a comunidade lectora que tivo o pracer de gozar das historias que narraba ao pé dese Atlántico vigués  que tanto amou e que converteu  nun referente literario e persoal.

O IES As Telleiras quere renderlle un profundo recoñecemento ao autor que acompañou e acompaña ano a ano, curso a curso, o itinerario lector de 1º Bacharelato coa proposta lectora da súa novela A praia dos afogados .

Xeracións de alumnos e alumnas peregrinaron á nosa Bibliotelleiras á procura dun dos exemplares desta obra que o Departamento de Lingua e Literatura Galega considerou sempre unha aposta segura como lectura do 2ª trimestre.

E como esquecer que Ollos de auga estreou un club de lectura que botaba a andar hai xa moitos anos no centro, coa banda sonora de Charlie Parker de fondo.

Quédanos a pena de verte marchar tan cedo, tanto que o título da túa novela, O último barco, parece hoxe unha escura premonición; pero déixasnos en herdanza o teu eterno alter ego, o fume do seu tabaco, o arrecendo das comidas no Bar Puerto e na taberna de Eligio, as noites de radio, os grolos de bo viño, as conversas cos amigos, a súa melancolía...

Sabemos que, onde queira que esteas, estarás sempre xa na compaña de bos e vellos amigos: Andrea Camilleri, que nos deixou tamén hai pouco, Vázquez Montalbán e outros moitos mestres que xogaredes na Primeira División da novela negra, o thriller, o giallo... xa sexa en galego, en castelán, en italiano...

No Olimpo da nosa Bibliotelleiras, Domingo, terás sempre un merecidísimo posto de honra, e na nosa memoria, o eterno agradecemento polas moitas horas de boa lectura que nos fixeches gozar.

Chegou o 23 de abril e con esta data a ocasión de homenaxear tamén este ano aos protagonistas desta festa: os libros, a lectura e os autores e autoras que coa súa imaxinación enchen as nosas vidas.

O IES As Telleiras non quixo deixar pasar esta  festividade e aproveitou para levar a cabo algunhas actividades nas que colaboraron activamente o Departamento de Lingua e Literatura Castelá, o ENL e a Bibliotelleiras.

Levamos a cabo na sala grande de lectura da biblioteca unha exposición con libros de  biografías, pertencentes aos nosos fondos bibliográficos:

GRANDES BIOGRAFÍAS: MULLERES E HOMES QUE FIXERON HISTORIA

Tratábase de dar visibilidade a un tipo ou subxénero literario-histórico do que contamos na nosa biblioteca con moitos exemplares que van desde a filosofía á música, pasando pola historia, a ciencia, as artes e a literatura, pero que nos últimos anos parecen estar un pouco relegados nas escollas lectoras.

Neste percorrido bibliográfico quixemos facer un apartado especial dedicado ás biografías de autoras e autores galegos: Fray Martín Sarmiento, María Mariño, Ramón Piñeiro, Xaquín Lorenzo, Roberto Blanco Torres, Álvaro Cunqueiro, Otero Pedrayo; Celso Emilio Ferreiro, Lugrís Freire, Siro López, Calros Rodrígez Silvar, Bieito Marín...

GRANDES BIOGRAFÍAS: APRENDENDO DEL@S, APRENDENDO CON EL@S

No vestíbulo do instituto un panel recordatorio do Día recordaba tamén frases famosas sobre libros, lecturas e bibliotecas.

O Departamento de Lingua e Literatura Castelá levou a cabo unha exposición de carteis (portadas de xornais) con textos, en ton humorístico, elaborados polo alumnado de 2º ESO (os tópicos literarios) e 4º ESO (Modernismo, Generación del 98 e Vanguardias) e 1º Bacharelato (Renacemento e Barroco) baixo o título

“TELLEIRAS TODAY. DIARIO SATÍRICO PARA AMANTES DE LA LITERATURA”.

O venres 22, no segundo tempo de lecer, un alumno de 1º ESO, Javier Oliveira Díaz, puxo voz na biblioteca a un fragmento da novela A balada dos unicornios, de Ledicia Costas; con esta lectura en voz alta quixemos homenaxear este día e, ao escoller esta obra, o alumno fixo unha mostra especial de afecto ao libro que leu no Club de lectura este ano.

O noso alumnado de 4º da ESO na materia de TIC levou a cabo este ano unha actividade relacionada coa Educación Vial con tan bos resultados que decidiron presentalo aos Premios Nacionales de Cortometrajes de Educación Vial organizados pola DGT e a Fundación RACE.

O resultado deste traballo é o vídeo titulado "Los peligros de la vía", que se atopa na seguinte ligazón. Se vos gusta podedes votar por el.

Co gallo da Celebración Internacional do Día da Muller o 8 de marzo de 2022, a Bibliotelleiras levou a cabo na sala de lectura unha exposición de materiais bibliográficos procedentes dos nosos fondos baixo o título “Artellando feminismo”, unha mirada sobre a historia deste movemento, e sobre as variadas opinións en torno a un tema que resulta esencial para a convivencia. Trátase de achegar ao alumnado e a toda a comunidade escolar en xeral obras que nos axudan a seguir formándonos e van dirixidas por igual a mulleres e homes que queren vivir en igualdade e traballar por ela.
Durante a mañá do día 8, nos dous tempos de lecer, un grupo de alumnos e alumnas da ESO  botoulle moitas ganas e moito ánimo  e animouse a facer chapas con deseños que o Departamento de Plástica previamente ideara sobre a conmemoración desta data e tamén sobre un non rotundo á guerra e  coas cores de Ucraína; posteriormente estas chapas foron repartidas entre todo o alumnado, o profesorado e o persoal non docente con gran éxito de acollida e  participación.

Agradecemos tamén  o traballo de colaboración do coordinador do Club de Ciencia, Manuel Couceiro, quen se encargou de poñer en marcha e supervisar a montaxe e funcionamento  do aparello de facer chapas xa desde días antes para que todo resultase sen problemas.
Así mesmo taboleiro do vestíbulo vestiuse de cor morada para acoller unha proposta do ENL sobre “Grandes mulleres tan brillante como descoñecidas”.