blogue debiblioteca

Para o alumnado de 1º ESO realizouse durante toda a mañá do xoves 8 de setembro, día da presentación, unhas XORNADAS DE ACOLLIDA con distintas actividades encamiñadas a dar a coñecer as instalacións e as distintas actividades que oferta o centro.
No marco destas xornadas o alumnado levou  a cabo a actividade “Coñece a túa Biblio” e realizou unha visita guiada pola Biblioteca onde se lle mostraron as instalacións, se lle deron a coñecer as normas básicas de funcionamento,  se lle informou das propostas de actividades que se levan a cabo ao longo do curso e se lle animou a formar parte dos Clubs de lectura que temos en marcha.
Ao mesmo tempo estivemos encantados de facilitarlles aos alumnos e alumnas calquera tipo de información que solicitaron, resolverlles  dúbidas e mesmo fixemos algunhas fotos que quedarán de recordo desta ocasión.
Organizados por clases e acompañados do seu profesorado, explicámoslles a profunda transformación que experimentou a biblioteca o curso pasado con motivo das obras levadas a cabo pola Consellería de Educación; mostráronse moi curiosos ao saber que gran parte dos espazos que forman hoxe a nosa Bibliotelleiras foran en tempos cuartos e dependencias da “casa do conserxe”, zona que só foi utilizada a tal fin durante uns poucos meses cando o instituto acababa de ser inaugurado aló polo ano 1985.
Chamoulles tamén moito a atención a zona exterior da biblioteca, á que nós cariñosamente  chamamos a “zona chill out”, que esperamos que ao longo deste curso poida ser habilitada e co mobiliario axeitado para ser usada como un espazo de lectura informal, ao aire libre, e onde sexa posible levar a cabo ademais actividades diversas: reunións dos clubs de lectura, encontros con autores e autoras, presentación de libros...
Tamén esa mesma mañá do 8 de setembro o alumnado de 1º Bacharelato de nova incorporación tivo ocasión de percorrer o centro para familiarizarse coas instalacións e un dos puntos de interese foi a visita á biblioteca, onde se lles informou do uso dos espazos, das normas básicas de funcionamento e se lles respondeu ás dúbidas que foron xurdindo durante a visita.
Así mesmo, durante o claustro do día 1 de setembro, o profesorado novo que se incorporou ao centro foi invitado a realizar unha visita á biblioteca, para coñecer as instalacións, os fondos documentais e as posibilidades que a nosa Bibliotelleiras poidan ofertar para o seu labor docente e tamén persoal.
Cómpre destacar que estas visitas resultaron moi interesantes para o alumnado que destacou a amplitude da biblioteca, a boa disposición, luminosidade e excelente ventilación de todos os espazos; así mesmo os máis pequenos quedaron sorprendidos pola grande cantidade de libros e o orde e clasificación dos mesmos.
Foi unha xornada moi agradable para todos e todas  e para nós unha ocasión especial de poder volver a facer in situ esta actividade que, polo motivo do covid e das obras levadas a cabo o verán pasado, no fora posible realizar de novo na propia biblioteca en cursos anteriores.  
Só nos queda dar a benvida a todos os usuarios e usuarias da Bibliotelleiras e queremos facelo da man do grande debuxante Quino, falecido en setembro do 2020, cunha das súas viñetas máis coñecidas.

IN MEMORIAM

Na tarde do martes 14 de xuño, desde as 16.20 ata as 18.00 horas, o alumnado e profesorado dos Clubs de lectura de “Historias de Ferrolterra” e de “Tecnoloxía e Robótica” tivemos o gusto de recibir na biblioteca do centro a visita do autor de dous das obras que foron obxecto de lectura este curso: El tesoro de Artabria e Las minas de Santa Comba.

Durante dúas horas que pasaron voando o autor, Juan José Lada Vilariño, antigo alumno do noso instituto, fíxonos partícipes das súas primeiras experiencias lectoras, do seu gusto por coñecer a historia de Ferrol e a súa contorna, do seu proceso creativo, dos pasos no mundo da edición, dos recordos da súa infancia e xuventude, do seu desexo de ser escritor e dos proxectos futuros que bulen xa na súa cabeza. E todo isto cunha exposición tan clara, interesante e amena  que  nos fixo gozar dese momento máxico que comparten autor e lectores e as lectoras cando se atopan xuntos por primeira vez.     

Cómpre destacar o interese amosado polo alumnado que, entre preguntas ao autor sobre as novelas, relatos das súas propias experiencias biográficas por Ferrolterra, anécdotas sobre as xuntanzas dos clubs nos tempos de lecer e risas en común, recoñeceu o seu gusto por estas lecturas e o éxito que supuxo a súa elección.

Ao remate da reunión, o autor fíxonos sentir como aos personaxes da súa primeira novela, cando, ao final da súa procura do “tesouro”, reciben da man do profesor de Historia un pequeno agasallo de moedas antigas que, no noso caso, se transformaron en moedas de chocolate.

Antes de despedilo e coa promesa de volvernos encontrar nun futuro próximo, fixémoslle entrega do pin do instituto e dalgúns detalles co logo do centro.

Para pechar este curso o tramo final  dos nosos Clubs de lectura, a tarde do venres 17 o alumnado e profesorado fixemos un percorrido por Ferrol, visitando algúns dos lugares onde transcorre a historia da primeira novela, El tesoro de Artabria, e que son os puntos onde se atopan as pistas que deben localizar os mozos e mozas protagonistas.

Aproveitamos para facer fotos en cada unha das localizacións atopadas e comentar o interese histórico-artístico das mesmas e tamén doutros lugares emblemáticos do Ferrol dos séculos XVIII e XIX que ían saíndo ao paso no noso percorrido.

Rematamos coa degustacións duns xeados no porto de Ferrol e, xa desde aí, regresamos ao punto de partida na Praza de Armas onde nos esperaban as familias do alumnado para dar por pechada a actividade.

Queremos agradecer ao persoal militar do Cuartel de Dolores que nos permitiu facer a visita a Fontelonga, a primeira das nosas etapas, e que nos acompañou moi amablemente durante o percorrido polo recinto.

Xa queda pouco para rematar este curso e a Bibliotelleiras quere encher o verán de recomendacións lectoras que nos farán pasar a tod@s momentos de lecer en contacto coa natureza, xa sexa na praia, no campo, no monte, nas pequenas vilas ou nas grandes cidades, viaxando ao estranxeiro ou quedando na casa.
Os bos libros farán máis desexables eses tempos de lecer que axudarán a descansar, recargar as pilas e volver en setembro con novas forzas e ánimos renovados para afrontar un novo curso.

O RECANTO DA RAPAZADA

UNHA CHEA DE PROPOSTAS PARA XENTE MOZA

LECTURAS PARA LECTORES E LECTORAS DESDE OS DEZAOITO ATA OS CEN.....

BOAS VACACIÓNS E BOAS LECTURAS!!!!!!!

O IES As Telleiras, desde a Biblioteca e en colaboración coa Vicedirección e o ENL, quixo render homenaxe ao escritor ao que a Real Academia da Lingua Galega  elixiu este ano 2022.
A figura  de Florencio Delgado (Córgomo, Valdeorras 1903-Fair Oaks, EEUU 1987), republicano e galeguista,  encarnou o activismo cultural dos galegos que tiveron que exiliarse en México e que tenderon pontes co exilio interior.

A súa obra poética está chea de sensualidade e revela o seu compromiso político: Bebedeira (1934), Cancioneiro da loita galega (1943), Galicia infinda (1963), Cantarenas (1981) e O soño do Guieiro (1986).
Durante a semana previa ao día 17 unha exposición de carteis informativos no vestíbulo do centro foi dando a coñecer a vida e obra do poeta, ao tempo que outro panel deixaba constancia dalgúns dos máis interesantes e coñecidos poemas da súa produción.

O día 16, durante o primeiro tempo de lecer, un grupo de alumnos e alumnas de 1º de Bacharelato puxeron voz a poemas escollidos de Florencio Delgado, nun acto de honra e homenaxe ao poeta ourensán.

A tarde do martes 29 de marzo, en horario de 16.20 a 18.00 horas, o alumnado de 2º ESO con materia de Investigación e tratamento da información, acompañado do seu profesorado, realizamos a tradicional visita á Biblioteca Municipal do Alto; alí fomos recibidos pola súa encargada, dona Ainhoa González, quen nos acompañou polas instalacións, nos explicou moitos datos de interese, nos permitiu coñecer zonas que non son, habitualmente, de acceso ao público en xeral (como o depósito de libros) e nos animou a todos e todas a facer uso dos recursos que ofrece a biblioteca a toda a comunidade do concello de Narón.
O alumnado tivo a ocasión de comprobar os coñecementos que foron adquirindo durante o curso sobre o funcionamento da CDU e de ver na práctica o funcionamento dun biblioteca  municipal dirixida a toda a veciñanza; o seu interese manifestouse na enorme cantidade de preguntas que fixeron durante todo o percorrido que fixo que o tempo voase literalmente.
Despois de ter interrompido esta actividade por mor da pandemia estes cursos pasados, foi motivo dunha enorme alegría poder volver a realizala; a encargada da biblioteca explicounos tamén os cambios e adaptacións que tiveron que facer tanto no funcionamento como no servizo de préstamo durante os períodos de peche que se viron obrigados a sufrir.
Para nós estar de novo alí supuxo, ademais dunha volta á normalidade, unha agradable ocasión de reencontrarnos co equipo da biblioteca que sempre nos ten recibido con moitísimo afecto e aproveitamos a ocasión para recordar como unha suxestión que fixera o último grupo de alumnado que realizou a visita  foi posta en marcha na  Axencia de Lectura de A Gándara.
Ao final do percorrido despedímonos do persoal da biblioteca agradecéndolle  o seu amable recibimento e co desexo de volver o próximo curso nunha nova visita.